Azərbaycan Milli Elmlər Akademiyası

Azərbaycanın ilk veb saytı (1995)

ANA SƏHİFƏ  >>  XƏBƏRLƏR  >>  KONFRANSLAR, İCLASLAR

05.03.2021 14:11
  • A-
  • A
  • A+

MEK-də 8 Mart - Beynəlxalq Qadınlar Günü qeyd olunub

MEK-də 8 Mart - Beynəlxalq Qadınlar Günü qeyd olunub

AMEA-nın Mərkəzi Elmi Kitabxanasında 8 Mart - Beynəlxalq Qadınlar Günü münasibətilə tədbir keçirilib.

Tədbirdə çıxış edən MEK-in direktoru, professor Məmməd Əliyev kitabxananın xanım əməkdaşlarını əlamətdar gün münasibətilə təbrik edib. M.Əliyev çıxışında Azərbaycan qadınının respublikanın ictimai-siyasi və mədəni həyatında fəal iştirak etdiyini, vətənin müdafiəsində daim fədakarlıq nümayiş etdirməklə müqəddəs bir missiyanı həyata keçirdiyini və Vətən müharibəsi zamanı həm ön cəbhədə, həm də arxa cəbhədə yüksək qəhrəmanlıq nümayiş etdirdiyini vurğulayıb.

Mərkəzi Elmi Kitabxananın qurulması və inkişaf etdirilməsində xanımların böyük zəhmətinin olduğunu deyən direktor bildirib ki, MEK-də xidmət işinin təşkili və digər sahələrdə işin böyük hissəsi xanım əməkdaşların üzərinə düşür.

O, ulu öndər Heydər Əliyevin Azərbaycan qadınları haqqında söylədiyi fikri tədbir iştirakçılarının diqqətinə çatdırıb: “Tariximizin keşməkeşli səhifələrinə Azərbaycan qadını qayğıkeş ana, fitri istedada malik şair, möhkəm iradəli hökmdar, dərin zəkalı mütəfəkkir kimi öz adını həkk etdirmişdir”.

“Bu gün Azərbaycan qadını cənab Prezident İlham Əliyev və Azərbaycan Respublikasının Birinci vitse-prezidenti Mehriban xanım Əliyevanın diqqəti və qayğısı sayəsində ölkənin ictimai-siyasi, sosial-iqtisadi və intellektual-mənəvi həyatında yaxından iştirak edirlər” - deyə Məmməd Əliyev bildirib.

Alim qeyd edib ki, Azərbaycan qadınları zərif çiyinlərinə götürdüyü missiyanı şərəflə daşıyır. Bu şərəfli missiyanın təmsilçiləri arasında şəhid anaları, şəhid xanımları və şəhid bacıları da var. Azərbaycan xalqı Qarabağ döyüşlərində istər ön cəbhədə, istərsə də arxa cəbhədə canı-qanı ilə Vətənə xidmət edən xanımların da xidmətini unutmayacaq, onları daim yad edəcək.

Tədbirdə AMEA Qadınlar Şurasının sədri, fəlsəfə elmləri doktoru, professor Rəna Mirzəzadə də öz növbəsində qadınları bu gün münasibətilə təbrik edərək, tədbirin məramı və ümumilikdə, Azərbaycan qadınının cəmiyyətdəki fəal rolu haqqında danışıb. AMEA-nın qadın əməkdaşlarının elmi fəaliyyətlərindən bəhs edən Rəna Mirzəzadə ölkənin tarixində, ictimai-siyasi həyatında Azərbaycan qadınlarının elm sahəsində əldə etdiyi nailiyyətlərdən, bütövlükdə elmdə gender bərabərliyi və dövlətin yaratdığı geniş imkanlardan danışıb.

Daha sonra MEK-in əməkdaşlarının hazırladığı 8 Mart - Beynəlxalq Qadınlar Gününün yaranma tarixinə həsr olunan videoçarx  nümayiş etdirilib.

Sonda MEK-in əməkdaşı Mətanət Muxtarova sözləri Fikrət Qocaya, musiqisi Sevil Əliyevaya aid olan “Ana” mahnısını royalda ifa edib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

  • Paylaş: