Oktyabrın 22-də AMEA-nın N.Tusi adına Şamaxı Astrofizika Rəsədxanasında görkəmli alim, fizika-riyaziyyat üzrə elmlər doktoru, professor Cəfər Quluzadənin 80 illik yubileyi münasibətilə beynəlxalq elmi konfrans keçirilib.
Tədbiri giriş sözü ilə açan rəsədxananın direktoru, AMEA-nın müxbir üzvü Namiq Cəlilov professor Cəfər Quluzadəyə həsr olunan beynəlxalq konfransın əhəmiyyətindən danışıb.
Sonra rəsədxananın elmi işlər üzrə direktor müavini, fizika-riyaziyyat elmləri namizədi Elçin Babayev görkəmli alimin keçdiyi zəngin həyat yolundan və qazandığı elmi nailiyyətlərdən bəhs edib. Bildirib ki, Leninqrad Dövlət Universitetinin məzunu olan Cəfər Quluzadə 200-dən çox elmi məqalənin, 6 dərsliyin, 2 metodik göstərişin və 1 monoqrafiyanın, eləcə də Günəş fizikası sahəsində bir çox elmi-tədqiqat işlərinin müəllifidir. O, ilk dəfə olaraq differensial, inteqral qalıq və nisbi asimmetriya anlayışlarını təklif edib.
Qeyd olunub ki, professor C.Quluzadə 1997-ci ildən Bakı Dövlət Universitetinin “Astrofizika” kafedrasının müdiridir.
Daha sonra Elçin Babayev Sankt-Peterburqdan, Ukraynadan, Çexiyadan, Almaniyadan, İstanbuldan və Moskvadan professor Cəfər Quluzadənin 80 illiyi münasibətilə göndərilən təbrik məktublarını konfrans iştirakçılarının diqqətinə çatdırıb.
Konfransda Bakı Dövlət Universitetinin Fizika fakültəsinin dekanı, fizika-riyaziyyat elmləri doktoru, professor Məmmədəli Ramazanov çıxış edərək alimin Bakı Dövlət Universitetindəki elmi fəaliyyətindən danışıb.
Təbriz Universitetinin professoru Samad Sobhanian, fizika-riyaziyyat elmləri namizədi, dosent Kəmalə Alışova çıxışlarında professor Cəfər Quluzadənin tədqiqatlarının elmə verdiyi töhfələri diqqətə çatdırıblar.
Tədbirdə AMEA-nın müxbir üzvü Əyyub Quliyevin, fizika-riyaziyyat üzrə fəlsəfə doktoru, professor Cəsarət Əliyevin, Təbriz Universitetinin professoru Ali Ajabşirizadehin məruzələri dinlənilib.
Sonda professor C.Quluzadə konfransın təşkilatçılarına və iştirakçılara minnətdarlığını bildirib.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.