Azərbaycan Milli Elmlər Akademiyası

İyunun 6-da AMEA-nın Humanitar Elmlər Bölməsinin (HEB) növbəti büro iclası keçirilib.

Tədbirdə bölmə üzvləri, elmi müəssisələrin rəhbərləri və HEB üzrə "AMEA-nın professoru" elmi adına namizədlər iştirak ediblər.

Bölmənin akademik-katibi, akademik Teymur Kərimli iclası giriş sözü ilə açaraq iştirakçıları gündəlikdəki məsələlərlə tanış edib.

Elmi-təşkilati məsələlərdən ilk olaraq AMEA Rəyasət Heyətinin 19 aprel 2017-ci il tarixli qərarı ilə elan edilmiş "AMEA-nın professoru" müsabiqəsinin gedişatı ilə bağlı müzakirələr aparılıb. Bildirilib ki, humanitar elmlər üzrə dörd alimin namizədliyi irəli sürülüb. Onlardan 2-si Ədəbiyyat İnstitutunun, 1-i Dilçilik İnstitutunun, 1-i isə Azərbaycan Dillər Universitetinin əməkdaşıdır.

Sonra namizədliyi qeydə alınmış alimlər fəaliyyətləri, əldə etdikləri nailiyyətlər haqqında bölmə üzvlərinə ətraflı məlumat veriblər.

Akademik Teymur Kərimli müsabiqədə AMEA-nın üzvü olmayan, elmi müəssisə və ali məktəblərdə elmi və ya elmi-pedaqoji fəaliyyətlə məşğul olan, milli və beynəlxalq səviyyəli elmi nailiyyətlər əldə etmiş, yüksəkixtisaslı elmi kadrların hazırlanması, elm və təhsilin vəhdətinin möhkəmləndirilməsində xüsusi xidmətlər göstərmiş, yaşı 50-dək olan elmlər doktorlarının iştirak etdiklərini diqqətə çatdırıb. Bölmənin akademik-katibi bu elmi adın alimlərə elmi fəaliyyətlərində stimul olacağını bildirib və onlara uğurlar arzulayıb.

Gündəlikdə yer alan növbəti məsələ AMEA Rəyasət Heyətinin 22 fevral 2017-ci il tarixli qərarı ilə təsdiq edilmiş "AMEA-nın professoru" elmi adı haqqında Əsasnaməyə uyğun olaraq HEB-in üzvlərindən ibarət Ekspert komissiyasının yaradılması ilə bağlı olub. Bölmənin qərarı ilə akademik Teymur Kərimli komissiyanın sədri təyin edilib.

Tədbirdə filologiya üzrə elmlər doktoru, professor Əlizadə Əsgərlinin Ədəbiyyat İnstitutunun elmi işlər üzrə direktor müavini vəzifəsinə təyin edilməsi ilə bağlı AMEA Rəyasət Heyəti qarşısında vəsatət qaldırılması qərara alıb.

Sonda cari məsələlərə baxılıb. Azərbaycan Respublikası Prezidentinin "Bülbülün 120 illik yubileyinin keçirilməsi haqqında" və "Azərbaycan Xalq Cümhuriyyətinin 100 illik yubileyi haqqında" sərəncamlarının icrası müzakirə olunub, elmi müəssisələrin rəhbərlərinə yubileylərlə bağlı bir sıra tapşırıqlar verilib. Həmçinin AMEA-nın müxbir üzvü Firəngiz Əlizadənin 70 illik yubileyinin keçirilməsi ilə bağlı AMEA Rəyasət Heyəti qarşısında vəsatət qaldırılması qərara alınıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.