Özbəkistanın Azərbaycandakı səfirliyi AMEA-nın Mərkəzi Elmi Kitabxanasına (MEK) bu ölkənin tarixini, mədəniyyətini, müasir dövlət quruculuğunu əks etdirən kitablar hədiyyə edib.
Kitablar MEK-in Akademiklər zalında yerləşən Diplomatik fondunda Özbəkistan üçün ayrılmış xüsusi guşədə yerləşdirilib.
Nəşrləri kitabxanaya Özbəkistan səfirliyinin müşaviri Muxammad Botraliyev, səfirliyin əməkdaşları Baxodir Musaxocayev və Oybek Akramov təqdim ediblər.
Akademiklər zalında keçirilən görüşdə MEK-in direktoru, tibb üzrə fəlsəfə doktoru Leyla İmanova rəhbərlik etdiyi qurumda Özbəkistana aid bölmənin yaradılmasından və qardaş ölkə ilə təməli qoyulan yeni əməkdaşlıqdan məmnunluğunu ifadə edib. O, hədiyyə olunan kitabların qısa müddətdə MEK-in elektron kataloquna yerləşdiriləcəyini söyləyib.
Özbəkistan səfirliyinin müşaviri Muxammad Botraliyev isə çıxışında ölkələr arasında elmi-mədəni əlaqələrin, xüsusilə ədəbiyyat mübadiləsinin əhəmiyyətindən danışıb.
Sonda qonaqlar MEK-in fondlarını, oxu zallarını gəzib, kitabxananın iş fəaliyyəti ilə yaxından tanış olublar.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.