Azərbaycan Milli Elmlər Akademiyası

Azərbaycanın ilk veb saytı (1995)

ANA SƏHİFƏ  >>  XƏBƏRLƏR  >>  KONFRANSLAR, İCLASLAR

İnformasiya Texnologiyaları İnstitutunun İctimaiyyətlə əlaqələr şöbəsinin 2021-ci il üzrə fəaliyyəti müzakirə olunub
26.11.2021 10:52
  • A-
  • A
  • A+

İnformasiya Texnologiyaları İnstitutunun İctimaiyyətlə əlaqələr şöbəsinin 2021-ci il üzrə fəaliyyəti müzakirə olunub

AMEA-nın İnformasiya Texnologiyaları İnstitutunun Elmi şurasının onlayn iclasında İctimaiyyətlə əlaqələr şöbəsinin 2021-ci il üzrə fəaliyyətinə dair hesabatı dinlənilib.

Hesabatı təqdim edən şöbə müdiri Rasim Mahmudov cari ilin yanvar-noyabr ayları ərzində www.ikt.az saytına olan müraciətlərin aylar üzrə paylanmasına dair statistikanı təqdim edib. İl ərzində sayta ümumilikdə 250074 dəfə müraciət olunduğunu söyləyib.

Hesabat ili ərzində ikt.az-a olan müraciətlərin ölkələr üzrə paylanması barədə məlumat verən şöbə müdiri, sayta Azərbaycan, Rusiya, ABŞ, Almaniya, Çin, Böyük Britaniya, Türkiyə öndə olmaqla, bütövlükdə 60-a yaxın dövlətdən müraciət olunduğunu vurğulayıb.

R.Mahmudov hesabat dövründə ikt.az saytında müxtəlif rublikalar üzrə 438 xəbər yerləşdirildiyini diqqətə çatdırıb.

O, cari ilin yanvar-noyabr ayları üçün institutun fəaliyyətinin mediada işıqlandırılması və əməkdaşların kütləvi informasiya vasitələrində çıxışlarına dair göstəriciləri təqdim edib. Müvafiq dövrdə elektron mediada institutun fəaliyyəti haqqında 442 məqalə dərc edilib.

Şöbə müdiri institut əməkdaşları tərəfindən “ağıllı şəhər” və “ağıllı kənd” konsepsiyaları ilə bağlı Azərbaycan Dövlət İnformasiya Agentliyinə (AZƏRTAC) 11 müsahibənin verildiyini, alim və mütəxəssislərin ölkənin əsas televiziya kanallarında NATO-nun dəstəyi ilə keçirilən “Sənaye idarəetmə sistemlərinin kibertəhlükəsizliyi problemləri” beynəlxalq konfransı ilə bağlı çıxışlar etdiklərini bildirib.

Sonra R.Mahmudov İctimaiyyətlə əlaqələr şöbəsinin qarşısında dayanan yeni vəzifələri iclas iştirakçılarının diqqətinə çatdırıb. Qeyd edib ki, buraya institutda həyata keçirilən struktur dəyişikliklərinə uyğun olaraq ikt.az saytının yenilənməsi, saytın proqram təminatı, dizaynı və kontent təminatının təkmilləşdirilməsi, saytın mobil versiyasının keyfiyyətinin yaxşılaşdırılması, media ilə əlaqələrin gücləndirilməsi, institutun alim və mütəxəssislərinin öz nailiyyətləri, bu elmi qurumun fəaliyyəti, İKT sahəsində dövlət siyasəti ilə bağlı KİV-də çıxışlarının intensivləşdirilməsi və s. tədbirlər daxildir.

Sonda AMEA-nın vitse-prezidenti, institutun baş direktoru, akademik Rasim Əliquliyev çıxış edərək, sözügedən müəssisənin fəaliyyəti haqqında məlumatların ölkə və dünya ictimaiyyətinə çatdırılmasında, kütləvi informasiya vasitələri ilə münasibətlərin yüksək səviyyədə təşkilində İctimaiyyətlə əlaqələr şöbəsinin fəal rolunu yüksək qiymətləndirib.

“Müasir dövrdə veb-texnologiyaların sürətli inkişafı, saytlarla bağlı yeni tələblərin formalaşması, institutda həyata keçirilən struktur dəyişiklikləri və digər səbəblər ikt.az saytının konsepsiyasının yenidən işlənilməsini zəruri edir”, - deyə akademik bildirib. Alim veb-saytın yeni versiyasının yüksək səviyyədə təşkili, dizaynı və proqram təminatının yeni tələblər əsasında, müasir texnologiyaların tətbiqi ilə hazırlanmasına dair təklif və tövsiyələrini səsləndirib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

  • Paylaş: