Azərbaycan Milli Elmlər Akademiyası

Azərbaycanın ilk veb saytı (1995)

ANA SƏHİFƏ  >>  XƏBƏRLƏR  >>  KONFRANSLAR, İCLASLAR

Nizami Gəncəvinin 880 illik yubileyinə həsr olunan beynəlxalq konfrans başa çatıb
27.11.2021 18:21
  • A-
  • A
  • A+

Nizami Gəncəvinin 880 illik yubileyinə həsr olunan beynəlxalq konfrans başa çatıb

AMEA-nın Nizami Gəncəvi adına Milli Azərbaycan Ədəbiyyatı Muzeyinin təşkilatçılığı ilə dahi Azərbaycan şairi və mütəfəkkiri Nizami Gəncəvinin 880 illik yubileyinə həsr olunmuş “Nizami Gəncəvi “Xəmsə”sinin Şərq-Qərb ədəbi-mədəni əlaqələri sistemində yeri və yaratdığı yeni istiqamətlər” mövzusunda beynəlxalq elmi konfrans başa çatıb.

Hibrid formatda keçirilən konfransda Azərbaycanın müxtəlif elm, təhsil ocaqları ilə yanaşı, dünyanın müxtəlif ölkələrindən, o cümlədən Türkiyə, Qazaxıstan, Özbəkistan və İtaliyadan tanınmış şərqşünas alimlər iştirak edib.

Üç gün davam edən konfransda Nizami Gəncəvi əsərlərinin tədqiqi, nəşri, tərcüməsi və incəsənət nümunələrində əksi mövzularını rəhbər tutan 11 bölmə iclasında 100-dən artıq məruzə dinlənilib.

Konfransda türkiyəli professor Ali Temizelin “Türkiyə universitetlərində Nizami Gəncəvi haqqında aparılan elmi araşdırmalar”, Bakı Dövlət Universitetinin dosenti Nüşabə Əlizadənin “Nizami Gəncəvi ədəbi irsinin yorulmaz tədqiqatçısı”, AMEA Nizami Gəncəvi adına Ədəbiyyat İnstitutunun əməkdaşı, dosent Könül Hacıyevanın “Nizami Gəncəvinin “Həft peykər” poeması və ona nəzirə olaraq yazılmış “Həşt behişt” əsəri haqqında”, Azərbaycan Turizm və Menecment Universitetinin dosenti Günay Qafarovanın “Nizaminin əlyazmalarını bəzəyən Təbriz miniatürlərinin etnoqrafik özəllikləri”, Naxçıvan Dövlət Universitetinin dosenti Mehriban Əsədullasoyun “XIX əsr Naxçıvan ədəbi mühitində Nizami Gəncəvi” və digər mövzularda məruzələr böyük marağa səbəb olub.

Tədbirin bağlanış mərasimində çıxış edən Ədəbiyyat Muzeyinin baş direktoru akademik Rafael Hüseynov dahi Nizaminin yaradıcılığının miqyası, müraciət etdiyi mövzularla bütün dünya xalqlarının şairi olduğunu bildirib, konfransda təqdim olunan məruzələrin əhəmiyyətini vurğulayıb. Akademik qeyd edib ki, maraqlı diskussiya şəraitində keçirilən konfransda Nizami yaradıcılığının ən müxtəlif aspektlərinə toxunulub, dahi şairin əsərlərinin Şərq və Qərb ədəbi-mədəni əlaqələrindəki rolu vurğulanıb.

Akademik Rafael Hüseynov konfransda Nizami Gəncəvi irsi və Avropa ədəbi-mədəni mühiti, Nizami şəxsiyyəti və irsinin beynəlxalq miqyasda tədqiqi, dahi mütəfəkkirin ədəbi məktəbi, “Xəmsə”nin müxtəlif dillərə tərcüməsi problemləri, Nizami irsi və klassik Şərq ədəbiyyatında forma, janr və poetika məsələləri, şairin irsinin Azərbaycan və dünya incəsənəti müstəvisində tədqiqi və digər mövzularda mühüm elmi müzakirələrin aparıldığını diqqətə çatdırıb, maraqlı məruzələrə görə iştirakçılara təşəkkürünü bildirib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

  • Paylaş: