AMEA-nın akademik Y.H.Məmmədəliyev adına Neft-Kimya Prosesləri İnstitutunun (NKPİ) əməkdaşları - kimya elmləri doktoru, professor Minavər İbrahimova və kimya üzrə fəlsəfə doktoru Fəxriyyə Abdullayeva tərəfindən yazılmış “İon mayeləri, sintezi və tətbiqi” adlı monoqrafiya “Elm” nəşriyyatında çapdan çıxıb.
Məlum olduğu kimi, XXI əsrdə bəşəriyyətin qarşılaşdığı ən qlobal problemlərdən biri ətraf mühitin qorunması problemidir və ekoloji zərərsiz istehsal və emal texnologiyalarının yaradılması bu problemin aradan qaldırılmasının perspektiv və praktiki əhəmiyyət kəsb edən istiqamətlərindən biri hesab olunur. Bu nöqteyi-nəzərdən monoqrafiyanın əsas məqsədi ion mayeləri elmi istiqaməti ilə yaxından maraqlanan tələbə, magistrant, doktorant və bu sahədə artıq müəyyən təcrübəsi olan digər mütəxəssislərin ion mayelərinə dair əsas anlayışlar, sintez üsulları, xassələri və tətbiq sahələri haqqında daha əhatəli məlumat əldə etmələri üçün imkan yaratmaqdan ibarətdir.
Monoqrafiyada, eyni zamanda həm dünya miqyasında, həm də NKPİ-nin əməkdaşları tərəfindən “yaşıl kimya” prinsiplərini qoruyan ion mayeləri, ion maye monomerlər və ion maye polimerlərin sintezi, tədqiqi və geniş spektrli tətbiq sahələri istiqamətində aparılmış tədqiqatların nəticələrini əks etdirən məlumatlar verilib. Təqdim olunan monoqrafiyada ion mayeləri barədə son illərin ədəbiyyat materialları daxil olmaqla yüksək impakt faktorlu jurnallarda dərc olunmuş bir çox ədəbiyyatlara və elmi əsərlərə müraciət edilib.
Qeyd olunanlar nəzərə alınaraq, monoqrafiyanın oxucularda bu sahəyə həsr olunmuş maraqlı və unikal materialları araşdırmağa maraq yaradacağına böyük ümid bəslənilir.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.