Azərbaycan Milli Elmlər Akademiyası

AMEA-nın Nəsimi adına Dilçilik İnstitutunun baş direktoru, filologiya üzrə elmlər doktoru, professor Nadir Məmmədlinin İstanbulda “Azerbaycan folkloru ve konuşma kültürü” adlı kitabı çap olunub.

Kitabı Azərbaycan dilindən Türkiyə türkcəsinə Dilçilik İnstitutunun Sosiolinqvistika və psixolinqvistika şöbəsinin elmi işçisi və əyani doktorantı Elnurə Hüseynova tərcümə edib.

Professor Ahmed Buranın redaktoru olduğu kitabda Azərbaycan folkloru və nitq mədəniyyəti məsələləri müfəssəl olaraq işıqlandırılıb. Şifahi xalq ədəbiyyatımızın bir çox növləri haqqında maraqlı məlumatlar nümunələrlə qeyd edilib. Əsərdə şifahi xalq ədəbiyyatımızın - mərasim nəğmələri, holavarlar, sağın nəğmələri, ovçu nəğmələri, balıqçı nəğmələri, ipəkçi nəğmələri, hana nəğmələri, toy nəğmələri, yas nəğmələri, laylalar, oxşamalar, düzgülər, sanamalar, təkərləmələr, acıtmalar, meydan tamaşaları, cıdır tamaşaları, atalar sözləri və zərb məsələləri, rəvayət, əfsanələr, lətifələr, nağıllar, dastanlar, tapmacalar, bayatılar, bağlamalar, inanclar, andlar, alqışlar, qarğışlar, dualar, yanıltmaclar kimi növləri müfəssəl məlumatlar və nümunələrlə oxucuların diqqətinə çatdırılır.

Əsərdən şifahi xalq ədəbiyyatı, onun ayrı-ayrı növlərini tədqiq edən tədqiqatçılar, bu sahə ilə maraqlanan hər kəs yararlana bilər.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.