Azərbaycan Milli Elmlər Akademiyası

Azərbaycanın ilk veb saytı (1995)

ANA SƏHİFƏ  >>  XƏBƏRLƏR  >>  MÜHÜM HADİSƏLƏR

19.12.2022 09:25
  • A-
  • A
  • A+

Türkiyəli arxeoloqlar ölkəmizin bir sıra tarixi abidələri ilə tanış olublar

Türkiyəli arxeoloqlar ölkəmizin bir sıra tarixi abidələri ilə tanış olublar

Türkiyənin İstanbul Universitetinin alimləri arxeoloqlar Prof. Dr. Necmi Karul və Dr. Eylem Özdoğan AMEA-nın Arxeologiya, Etnoqrafiya və Antropologiya İnstitutunda qonaq olublar.

Qonaqlar Türkiyənin Şanlıurfa şəhəri yaxınlığında yerləşən “Göbəklitəpə” arxeoloji abidəsinə həsr olunan dünyanın mədəni irs silsiləsindən “Daş təpələr: Sivilizasiyanın erkən coğrafiyası” mövzusunda elmi seminarda çıxış ediblər.

Səfər çərçivəsində qonaqlar Azərbaycanın tarixi, arxeoloji və memarlıq abidələri ilə də tanış olublar. Göbəklitəpənin həmyaşıdı Qobustan Dövlət Tarix və Bədii Qoruğu ərazisində qapalı və açıq səma altında yerləşən muzeyin mezolit və neolit dövrü qayaüstü təsvirləri ilə tanış olan alimlər ulu babalarımızın yüksək sivilizasiyaya malik olması qənaətinə gəliblər.

Elmi seminardan sonra onlar Suraxanı rayonu ərazisində yerləşən Atəşgah Məbədi Tarix-Memarlıq və Qala Dövlət Tarix- Etnoqrafiya qoruqlarında olublar.

Alimlər daha sonra arxeoloji qazıntı işləri ilə yerində tanış olmaq üçün qədim Qəbələnin Qala və Səlbir ərazilərini gəziblər.

Arxeoloqlar işğaldan azad olunmuş Ağdam ərazisinə səfər edərək Üzərliktəpə, Qullartəpə, Ağdamın İmarət qəbiristanlığı, Ağdam məscidi, Şahbulaq qalası, Boyəhmədli kurqanları ilə tanış olublar. Prof. Dr. Necmi Karul bildirib ki, dünyanın heç yerində belə vəhşiliklərlə üzləşmək mümkün deyil.

Qeyd edək ki, 2023-cü ildə azərbaycanlı arxeoloqların Göbəklitəpədə arxeoloji qazıntı işləri aparmaları nəzərdə tutulur.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

  • Paylaş: