Azərbaycan Milli Elmlər Akademiyası

Azərbaycan Respublikasının Elm və Təhsil Nazirliyinin Biofizika İnstitutunda Elmi şuranın növbəti iclası keçirilib.

Tədbir institutun baş direktoru AMEA-nın müxbir üzvü Oktay Qasımovun rəhbərliyi altında baş tutub. Oktay Qasımov iclası açaraq iştirakçıları salamlayıb, Elmi şuranın fəaliyyətinin institutun elmi-tədqiqat sahəsində oynadığı rolu vurğulayıb və gündəlikdə olan məsələlər barədə məlumat verib.

İclasın davamında Fiziki-kimyəvi stress faktorlarının biofizikası, Biomolekulların strukturu, dinamikası və funksiyası və Molekulyar və hüceyrə onkologiyası laboratoriyalarının 2024-cü ilə dair illik elmi və təşkilati hesabatları dinlənilib. Laboratoriyaların müdirləri – b.ü.f.d., dos. Sevinc Cəfərova, b.ü.f.d. Leylaxanım Məlikova, eləcə də tədqiqat proseslərinin əsas icraçılarından biri olan elmi işçi Mətanət Baxışova, hesabatları təqdim ediblər. Hər bir təqdimat laboratoriyaların 2024-cü ildə həyata keçirdiyi mühüm elmi işləri və əldə etdiyi nəticələri əhatə edib.

Təqdimatlar zamanı laboratoriyalar tərəfindən müxtəlif istiqamətlərdə aparılmış araşdırmalara dair ətraflı məlumat verilib. Fiziki-kimyəvi stress faktorlarının biofizikası laboratoriyası ekoloji və sənaye mənşəli stress faktorlarının bioloji sistemlərə təsirini araşdıraraq, stressin molekulyar və hüceyrə səviyyəsində baş verən dəyişikliklərə necə təsir göstərdiyini tədqiq edib. Biomolekulların strukturu, dinamikası və funksiyası laboratoriyası biomolekulyar strukturların funksional aspektlərini tədqiq edərək, bu sahədə bir sıra yenilikçi yanaşmaları irəli sürüb və yüksək səviyyəli nəşrlər hazırlayıb. Molekulyar və hüceyrə onkologiyası laboratoriyası isə xərçəng hüceyrələrinin molekulyar mexanizmlərini daha dərindən anlamaq üçün yeni yanaşmalar təqdim edib və bu istiqamətdə əhəmiyyətli nəticələr əldə edib.

Hesabatlar zamanı qeyd olunub ki, 2024-cü ildə hər üç laboratoriyanın elmi işçiləri tərəfindən beynəlxalq indeksli yüksək impakt faktorlu jurnallarda məqalələr dərc edilib. Bu məqalələr tədqiqatların dünya səviyyəsində qəbul olunmasının və Azərbaycan elminin beynəlxalq aləmdə mövqeyinin gücləndirilməsinin göstəricisi kimi qiymətləndirilib. Bundan əlavə, laboratoriyalar tərəfindən həm yerli, həm də beynəlxalq qurumlar tərəfindən dəstəklənən qrant layihələrində iştirak edilib. Bu layihələr yalnız maliyyə dəstəyi deyil, həmçinin təcrübə və bilik mübadiləsi baxımından da əhəmiyyətli olub.

Daha sonra Biofizika İnstitutunun Gənc Alim və Mütəxəssislər Şurasının 2024-cü il üzrə fəaliyyət hesabatı təqdim olunub. Hesabatı Şuranın sədri, e.i. Mətanət Baxışova təqdim edib. O, çıxışında gənc tədqiqatçıların inkişafı üçün təşkil olunmuş tədbirlər, həyata keçirilən layihələr və əldə olunan uğurlar barədə ətraflı məlumat verib. Hesabatda, həmçinin gənclərin elmi fəaliyyətə cəlb olunması, onların beynəlxalq təcrübə imkanlarının artırılması və institutdaxili innovativ təşəbbüslərin dəstəklənməsi ilə bağlı görülən işlər ətraflı şəkildə qeyd olunub. Müzakirələr zamanı Şura üzvləri bu sahədə əlavə imkanların yaradılması üçün təkliflərini səsləndiriblər.

İclasın sonunda professor Oktay Qasımov təqdim olunmuş hesabatların təsdiqlənməsi üçün səsvermə keçirib. Elmi şura üzvləri yekdilliklə laboratoriyaların və Gənc Alim və Mütəxəssislər Şurasının hesabatlarını qəbul ediblər.

İclasın yekununda bir sıra cari məsələlər müzakirə olunub. Bu məsələlər sırasında institutun qarşıdakı illərdə reallaşdırmağı planlaşdırdığı layihələr, beynəlxalq əməkdaşlıqların daha da genişləndirilməsi, yeni qrant layihələrinin hazırlanması və gənc tədqiqatçıların dəstəklənməsi üçün xüsusi tədbirlərin görülməsi yer alıb. Həmçinin, elmi-tədqiqat proseslərinin müasir tələblərə uyğun yenidən qurulması, elmi nailiyyətlərin kommersiyalaşdırılması və gənc kadrların potensialının artırılması istiqamətində strateji planların hazırlanması ilə bağlı müzakirələr aparılıb. İştirakçılar bu məsələlərə dair konkret təkliflər irəli sürərək qərarların qəbul edilməsində iştirak ediblər.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.