Azərbaycan Milli Elmlər Akademiyası

Azərbaycan Silahlı Qüvvələrinin giziri, Vətən müharibəsinin şəhidi, Vətən Müharibəsi Qəhrəmanı İntiqam Bayram oğlu Əsgərliyə məxsus materiallar Tarix Muzeyin Vətən müharibəsi fondunda mühafizə olunur.

İ.Əsgərli 16 avqust 1990-cı ildə Masallı rayonunun Viləş kəndində anadan olub. 1997-2008-ci illərdə S.Hacıyev adına Viləş kənd tam orta məktəbində təhsil alıb. Orta təhsilini aldıqdan sonra həqiqi hərbi xidmətə çağırılıb. 2011-ci ildə Quru Qoşunlarının gizirlik kursunu bitirib, 2014-cu il Xüsusi Təyinatlı Qüvvələrin giziri kimi işə başlayıb. 2015-ci ildə Türkiyədə kəşfiyyat kursunu bitirib.

4 aprel 2016-cı ildə Talış kəndi istiqamətində döyüş tapşırığını yerinə yetirərkən qardaşı Nurlan Əsgərli şəhid olub və İntiqam Əsgərli onun nəşini özü döyüş meydanından çıxardıb.

İntiqam Əsgərli 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Şuşanın azadlığı uğrunda gedən döyüşlərdə savaşıb. 9 noyabr 2020-ci ildə Şuşa istiqamətində gedən döyüşlərdə döyüş tapşırığının yerinə yetirilməsi zamanı şəhid olub.

İntiqam Əsgərli ailəli idi, Nur adlı qızı, ölümündən sonra doğulan İntiqam adlı oğlu yadigar qalıb.

Şəhidin materialları ailəsi tərəfindən muzeyə təhvil verilib.

Qeyd edək ki, şəhid İntiqam Əsgərli “Azərbaycan Silahlı Qüvvələrinin 95 illiyi” yubiley medalı, “Qüsursuz xidmətə görə” 3-cü dərəcəli medalı, “Azərbaycan Ordusunun 100 illiyi” yubiley medalı, “Vətən Müharibəsi Qəhrəmanı” medalı (ölümündən sonra), “Vətən uğrunda” medalı (ölümündən sonra), “Şuşanın azad olunmasına görə” medalı (ölümündən sonra), “Cəsur döyüşçü” medalı (ölümündən sonra), “Xocavəndin azad olunmasına görə” medalı (ölümündən sonra) və “Kəlbəcərin azad olunmasına görə” medalı (ölümündən sonra) ilə təltif olunub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.