Azərbaycan Milli Elmlər Akademiyası

AMEA-nın Elm Tarixi İnstitutunun (ETİ) Elmin nəzəri və metodoloji problemləri şöbəsinin elmi işçisi Novruz Nuriyevin “Bakinski raboçi” qəzetində “Həsənəli xan Qaradaği” və “Həsən bəy Zərdabi” mövzusunda iki müsahibəsi dərc olunub.

Birinci mövzu üzrə Qarabağ torpağının görkəmli ziyalılarından Həsənəli xan Qaradağinin həyat və yaradıcılığı haqqında ümumi məlumat verən Novruz Nuriyev onun Azərbaycan tarixşünaslığında özünəməxsus yeri olduğuna xüsusi diqqət çəkib.

Müsahibədə Qarabağın tarixi haqqında XIX əsrdə qələmə alınan əsərlərdən birinin müəllifi olan Həsənəli xanın əsərdə Qarabağın sərhədləri və coğrafi mövqeyi, həmçinin toponimikası haqqında unikal məlumatlar qeyd etdiyi vurğulanıb, görkəmli ziyalının “Vətən dili” dərsliyinin həmmüəlliflərindən biri kimi pedaqoji fəaliyyəti, xəttatlıq və folklor nümunələri ilə bağlı tədqiqatları haqda maraqlı məlumatlar da oxucuların diqqətinə çatdırılıb.

İkinci müsahibədə isə Azərbaycan mətbuatının banisi, görkəmli ziyalı Həsən bəy Zərdabinin təbiətşünaslıq elmi ilə bağlı yaradıcılığından bəhs olunub və Həsən bəyin “Torpaq, su və hava” adlı əsərinin Azərbaycan təbiətşünaslıq tarixində yeri və rolu xüsusi qeyd edilib.

Əsərdə XIX əsrin sonu, XX əsrin əvvəllərində müxtəlif təbiət hadisələri və coğrafi biliklərin yer alması, həmin biliklərin əhəmiyyəti və unikallığı oxucuların diqqətinə çatdırılıb. Həsən bəyin ixtisasca təbiətşünas olması və Bakı Real Məktəbində bu elm üzrə tədris aparması ilə bağlı tarixi faktlara toxunulub. Həmçinin həmin dövrdə dəqiq və təbiət elmləri ilə bağlı əsərlər qələmə alan bir sıra Azərbaycan ziyalıları haqqında da ümumi məlumat verilib.

Məqalə ilə buradan tanış ola bilərsiniz.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.