Azərbaycan Milli Elmlər Akademiyası

AMEA-nın Mərkəzi Elmi Kitabxanasının (MEK) “Azərbaycanın elm və mədəniyyət xadimləri” seriyasından yeni nəşr olunan görkəmli kimyaçı alim, Dövlət mükafatı laureatı, “Şöhrət” ordenli, AMEA-nın vitse-prezidenti, “Azərbaycan Milli Ensiklopediyası” Elmi Mərkəzinin direktoru, akademik Tofiq Murtuza oğlu Nağıyevin biblioqrafik göstəricisi işıq üzü görüb.

Biblioqrafiya kimya elminin inkişafına fundamental elmi tədqiqatları və “Kimyəvi əlaqə”, “Kimya və biologiyada sinxron reaksiyaların qarşılıqlı əlaqəsi”, “Hidrogen peroksidlə koherent baxış”, “Əlaqə reaksiyaları müasir ideyalar kontekstində” monoqrafiyaları ilə xüsusi töhfələr verən və “Nağıyev effekti” ilə tanınan akademikin həyat və yaradıcılığına həsr olunub. 1964-2021-ci illəri əhatə edən vəsaitə alimin Azərbaycan dilində və xarici dillərdə çap olunmuş kitabları, elmi məqalə, tezisləri, dövrü mətbuatda dərc edilmiş məqalələri, rəhbərlik etdiyi dissertasiya işləri, müəlliflik şəhadətnamələri və patentlərinə dair məlumatlar daxil edilib.

Görkəmli alimin 80 illiyinə həsr olunan göstəricidə T.Nağıyevin həyat və fəaliyyətinə dair oçerkdə elmi-pedaqoji, ictimai fəaliyyətinin əsas istiqamətləri, həmçinin milli ensiklopediya və maarifçilik fəaliyyətindən bəhs olunur.

AMEA Rəyasət Heyətinin qərarına əsasən tərtib olunan biblioqrafik göstəricinin elmi redaktoru Əməkdar jurnalist Sevda Mehrəliyeva, redaktoru MEK-in Kitabxana xidməti üzrə direktor müavini filologiya üzrə fəlsəfə doktoru, dosent Şəhla Tahirqızı, tərtibçiləri Sevda Mehrəliyeva və kimya üzrə fəlsəfə doktoru Zoya Zaytsevadır.

Akademik Tofiq Nağıyevin rəhbərliyi ilə 24 fəlsəfə və 1 elmlər doktoru hazırlanıb. O, 500-dən artıq elmi  əsərin, 42  patent  və müəlliflik şəhadətnaməsinin, 5 monoqrafiyanın müəllifidir.

Biblioqrafik göstərici fiziki kimya sahəsində çalışan alim və mütəxəssislər, ali məktəb tələbələri, o cümlədən geniş oxucu kütləsi üçün nəzərdə tutulub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.