Azərbaycan Milli Elmlər Akademiyası

Elm və Təhsil Nazirliyinin Kataliz və Qeyri-üzvi Kimya İnstitutunun əməkdaşlarının “Nanotexnologiyaya əsaslanan dərman çatdırılma sistemlərinin dizaynında və inkişafında hesablama modelləşdirməsinin rolu” (Role of Computational Modeling in the Design and Development of Nanotechnology-based Drug Delivery Systems) adlı icmal məqaləsi Web of Science, Scopus, Chemical Abstracts və digər nüfuzlu beynəlxalq bazalara daxil edilmiş Q3 kvartilli və impakt faktoru 1.60 Xorvatiya Kimya Mühəndisləri Cəmiyyətinin Rəsmi Jurnalı olan “Kimya və Biokimyəvi Mühəndisliyin Rüblük Jurnalı”nda (Chemical and Biochemical Engineering Quarterly) (Chem. Biochem. Eng. Q., 38(2) 97-110 (2024), doi: https://doi.org/10.15255/CABEQ.2024.2290) işıq üzü görüb.

Nanotexnologiyanın mühüm aspekti olan dərmanların çatdırılması üçün nanohissəciklərin hazırlanması çoxsaylı problemlərlə qarşılaşır. Bunlara uyğun köməkçi maddələrin seçilməsi, həll olunma faktorlarının aydınlığı, dərmanın effektiv inkapsulyasiyası və ayrılmasının təmin edilməsi, stabilliyin qiymətləndirilməsi və ünvanlı çatdırılması üçün qan dövranında dərman nəqlinin asanlaşdırılması daxildir. Bu mürəkkəb problemləri həll etmək üçün bir sıra molekulyar hesablama modellərindən istifadə olunur. Müxtəlif metodologiyalar nanohissəciklərin hazırlanmasında iştirak edən mürəkkəb mexanizmlərin aydınlaşdırılmasında mühüm rol oynayır və dərmanların çatdırılması üçün müxtəlif üzvi və qeyri-üzvi sistemlərin yaradılmasında vacibdir. Bu icmal ilk növbədə bu hesablama simulyasiya (kvant mexaniki simulyasiyalar, molekulyar dinamika (MD), dissipativ hissəcik dinamikası (DPD) və digər) modellərinə və onların nanohissəciklərə əsaslanan dərman çatdırılma sistemləri kontekstindəki əhəmiyyətinə diqqət yetirir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.