Azərbaycan Milli Elmlər Akademiyası

Növbəti Avrasiya Torpaq Konqresi 2025-ci ildə Türkiyədə keçiriləcək. Bu haqda məlumatı Konqresin Təşkilat komitəsinin üzvü, Azərbyacan Respublikası üzrə əlaqələndirici şəxs Fərid Mustafayev verib. O qeyd edib ki, 1-4 sentyabr 2025-ci il tarixlərində Türkiyənin Samsun şəhərində 11-ci Beynəlxalq “İqlim Dəyişiklikləri Şəraitində Torpaq Elmi və Bitki Qidalanmasında İnnovasiyalar” Konqresi (Eurasian Soil Congress 2025) keçiriləcək.

Eurasian Soil Congress 2025 torpaq elmi və bitki qidalanması sahəsində ən son yenilikləri araşdırmaq məqsədilə dünyanın hər yerindən tədqiqatçıları, akademikləri, sənaye mütəxəssislərini və siyasətçiləri bir araya gətirməyi hədəfləyir. Qlobal iqlim dəyişikliklərinin yaratdığı problemlərlə üzləşdiyimiz bir dövrdə, bu konqres davamlı torpaq idarəçiliyinə və dayanıqlı kənd təsərrüfatı təcrübələrinə töhfə verəcək qabaqcıl tədqiqatlar, innovativ həllər və praktiki yanaşmaların paylaşılması üçün vacib platformadır. 

Konqres iştirakçıları arasında məhsuldar bilik və ideya mübadiləsinə, elmi biliklərin genişləndirilməsinə və əməkdaşlığın qurulmasına şərait yaradacaq. Biz torpağın münbitliyi, davamlı bitki qidalanması və iqlimə uyğun texnologiyalar ətrafında müzakirələr apararaq, elmi anlayışları real tətbiqlərlə əlaqələndirməyə çalışacağıq.

Əsas məqsədimiz, iqlim dəyişiklikləri fonunda, torpaq elmi və bitki qidalanması sahələrində mənalı elmi mübadiləni, əməkdaşlığı və innovasiyaları təşviq edən bir konqres yaratmaqdır.

İştirakçılar üçün ruhlandırıcı və zəngin bir təcrübə təqdim etməyə sadiqik və xüsusilə gənc alimlərin iştirakını təşviq etməyə diqqət yetiririk. Birlikdə, Samsun şəhərində keçiriləcək 11-ci Eurasian Soil Congress tədbirini torpaq elmi icması üçün yaddaqalan və təsirli bir hadisəyə çevirməkdə qərarlıyıq.

Eurasian Soil Congress 2025-in Elmi Komitəsi, Avrasiya ölkələrinin milli torpaq elmi cəmiyyətləri tərəfindən namizəd göstərilən və Təşkilat Komitəsi tərəfindən seçilən tanınmış alimlər, tədqiqatçılar və mütəxəssislərdən ibarətdir. Üzvlər torpaq elmi və bitki qidalanması üzrə müxtəlif sahələri təmsil edir, regionun fərqli tədqiqat maraqlarını əks etdirir. Elmi Komitənin əsas vəzifəsi, həm fundamental tədqiqatları, həm də torpaq və bitki qidalanması üzrə yenilikçi yanaşmaları əhatə edən elmi cəhətdən möhkəm və əhatəli proqram təmin etməkdir.Onların töhfələri, konqres sessiyalarını formalaşdırma-ğa, fənlərarası dialoqu təşviq etməyə və iştirakçılar arasında əməkdaşlığı gücləndirməyə kömək edəcəkdir. Elmi Komitə üzvlərinə bu konqresin elmi keyfiyyətini artırmaq və onu torpaq elmi icması üçün həm maarifləndirici, həm də təsirli etməkdəki səylərinə görə minnətdarıq.

Eurasian Soil Congress 2025 çərçivəsində torpaq elmi və bitki qidalanmasının müxtəlif sahələrini əhatə etmək məqsədilə, Elmi Komitə həm fundamental, həm də yeni tədqiqat mövzularını əhatə edən 17 əsas mövzu müəyyən etmişdir. Bu mövzular üzrə təqdim olunan tezislər müvafiq komitə üzvləri tərəfindən qiymətləndiriləcək və təşkil olunacaq. Ətraflı məlumatları konqresin https://soil2025.com internet səhifəsində əldə edə bilərsiniz.

Sizi elmi dəqiqliyi və səmimi yoldaşlığı birləşdirən unudulmaz bir tədbirdə iştirak etməyə səmimi qəlbdən dəvət edirik. Gəlin, torpaq elmi və bitki qidalanması dünyasında birgə fərq yaradaq!

Nəzərinizə çatdırmaq istəyirik ki, Eurasian Soil Congress 2023  Azərbaycan Respublikasının ev sahibliyi ilə 21-23 iyun tarixində Bakıda keçirilmişdir. Konqresin sədri Azərbaycan Respublikasının Torpaqşünaslar Cəmiyyətinin və Avrasiya Torapqşünaslar Cəmiyyətləri Federasiyasının prezidenti, akademik Qərib Məmmədovun təşkilatçılığı ilə tədbir ümumilikdə 8 ölkə üzrə 30 xarici və 550- yə yaxın yerli nümayəndənin iştirakı ilə baş tutmuşdur. 

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.