Azərbaycan Milli Elmlər Akademiyası

Fevralın son günündə cari ilin növbəti planetlər paradı baş tutacaq. Paradda 7 planetin hər biri iştirak edəcək ki, bu fenomenal təbiət hadisəsi zamanı planetlər Yer səmasında bir düz xətt üzrə sıralanırlar. Lakin planetlərin konfiqurasiyası isə kosmosda tamamilə fərqli olur.

Məlumat üçün bildiririk ki, Yupiter, Mars və Venera adi gözlə görünsələr də, Uran və Neptun istənilən halda adi gözlə görünmür və onları müşahidə etmək üçün kiçik teleskop və ya durbin tələb olunur. Merkuri və Saturn isə Günəşə çox yaxın yerləşdikləri üçün onları adi gözlə seçmək çətin olur.

Bu axşam baş tutacaq planetlərin böyük paradını  Günəş batdıqdan dərhal sonra təxminən bir saatlıq müddət ərzində izləmək olacaq. Belə ki, Bakı vaxti ilə Günəş saat 18:31-də batacaq, bunun ardınca isə artıq Saturn, Merkuri və Neptun qərbdə Günəş batdığı yerdə üfüq yaxınlığında olacaqlar. Onlardan  fərqli olaraq Uran gecə yarısınadək, Yupiter 02:11-dək,  Mars isə bütün gecə boyu görünəcəkdir.

Qeyd edək ki, 21 yanvar paradında Merkuri iştirak etmirdi və 11 avqustda baş tutacaq növbəti paradda da artıq Mars olmayacaq.

Planetlərin səmadakı mövqeyini daha asan tapmaq üçün “Sky Map”, “Stellarium” və ya “Sky Tonight” kimi tətbiqlərdən istifadə etmək olar. Martın ilk günlərinədək bir neçə gün ərzində planetləri səmada bir yerdə izləmək mümkün olacaq. Növbəti dəfə 7 planetin də iştirak edəcəyi parad 2040-cı ildə olacaq.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.