Azerbaijan National Academy of Sciences

AMEA-nın vitse-prezidenti, akademik İbrahim Quliyevin koordinatorluğu ilə AMEA Rəyasət Heyəti aparatının Xarici əlaqələr idarəsi tərəfindən Avropa Komissiyasının “Horizon 2020” Tədqiqat və İnnovasiya Proqramı üzrə Milli Əlaqələndirici Şəxslər (MƏŞ) Şəbəkəsinin üzvlərinin iştirakı ilə Yaşıl Razılaşma (Green Deal Call) Çağırışı üzrə məlumatlandırma vebinarları təşkil edilib. Vebinarlarda AMEA-nın Fizika-Riyaziyyat və Texnika, Kimya, Yer, Biologiya və Tibb Elmləri bölmələrinin elmi müəssisələrinin nümayəndələri, həmçinin  Xəzər Universitetinin alim və mütəxəssisləri iştirak edib.

Tədbir zamanı İqlim fəaliyyətləri, ətraf mühit, resurs səmərəliliyi və xammal istiqaməti üzrə MƏŞ Rövşən Kərimov 10 tematik sahəni özündə birləşdirən Yaşıl Razılaşma Çağırışı, bu Çağırışa qoşulmanın şərtləri və tələbləri, “Horizon 2020” portalında qeydiyyat və potensial tərəfdaş qurumlara müraciət etmə qaydaları, həmçinin 2021-2027-ci illəri əhatə edəcək yeni “Horizon Europe” Proqramının prioritetləri barədə ətraflı məlumat verib. O, həmçinin Çağırış çərçivəsində “Artmaqda olan iqlim ambisiyaları: sahələrarası problemlər” tematik sahəsi üzrə mövzular və onlardan istifadə imkanlarını diqqətə çatdırıb.

Vebinarda Kosmos istiqaməti üzrə MƏŞ Aynurə Məsimova “Biomüxtəliflik və ekosistem xidmətləri”, Ərzaq təhlükəsizliyi, davamlı kənd təsərrüfatı, dəniz və dəniz tədqiqatları, bioiqtisadiyyat və biotexnologiya üzrə MƏŞ Fərid Seyfullayev “Fermadan çəngələ”, Hüquq və maliyyə aspektləri üzrə MƏŞ Tofiq Babayev və Nanotexnologiyalar, qabaqcıl materiallar, qabaqcıl istehsal və proseslər üzrə MƏŞ Aytən Hüseynova “Enerji və resursa qənaət edən səmərəli tikililər”, “Avropa Yaşıl Çağırışlarına dəstək üçün biliklərin artırılması”, “Neytral iqlimli və davamlı Avropaya keçid üçün vətəndaşların imkanlarının genişləndirilməsi”, Səhiyyə, demoqrafik dəyişiklik və rifah üzrə MƏŞ Aygün Babayeva  “Sıfır çirklənmə, toksik maddələrdən azad ətraf mühit” tematik sahələri, onların yarımistiqamətləri və müxtəlif mövzuları haqqında vebinar iştirakçılarını ətraflı məlumatlandırıblar.

Vebinarlarda Mari Sklodovskaya-Küri Proqramı üzrə MƏŞ Zaur Həsənov həmin proqramın istiqamətləri, COST Action Proqramı üzrə MƏŞ İlham Hümbətov bu proqramın geniş əməkdaşlıq imkanları üzrə təqdimat ediblər.

Keçirilən vebinarlar geniş auditoriya tərəfindən yüksək fəallıqla izlənib və iştirakçıları maraqlandıran suallar cavablandırılıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.