Azərbaycan Milli Elmlər Akademiyası

AMEA-nın vitse-prezidenti, akademik İbrahim Quliyev BMT-nin Ətraf Mühit Proqramının xoşməramlı səfiri, əfsanəvi xokkeyçi Vyaçeslav Fetisov və RussiaNew.Com İnformasiya Agentliyinin baş direktoru Serqey Rıbakov ilə görüşüb.

Görüş zamanı müasir dövrün qlobal ekoloji problemlərinin səbəbləri, təbiətə və bəşəriyyətə təsiri, fəsadları, iqtisadi zərəri və onların aradan qaldırılması yolları müzakirə edilib.

Akademik İ.Quliyev AMEA-nın elmi müəssisələrində bu istiqamətdə aparılan tədqiqat işləri, Xəzər dənizinin tədqiqi və mühafizəsi üzrə həyata keçirilən və nəzərdə tutulan layihələr barədə qonaqlara məlumat verib. Rusiya Elmlər Akademiyasının prezidenti, akademik Aleksandr Serqeyevin Azərbaycana səfərini xatırladan alim müvafiq istiqamətdə beynəlxalq əməkdaşlığın yüksələn xətlə inkişaf edəcəyinə əminliyini ifadə edib.

Görüşdə ətraf mühit problemlərinin həlli üçün qlobal monitorinqlərin keçirilməsinin, istehsal sahəsinə nəzarətin gücləndirilməsinin, həmçinin cəmiyyətin bütün təbəqələrinin maarifləndirilməsi işinə elmi ictimaiyyətin cəlb edilməsinin vacibliyi vurğulanıb. Tərəflər bu istiqamətdə konkret məsələləri əhatə edəcək əməkdaşlıq sənədinin imzalanması üzrə razılığa gəliblər.

Görüşdə AMEA Yer Elmləri Bölməsinin akademik-katibi, akademik Fəxrəddin Qədirov, Coğrafiya İnstitutunun direktoru, akademik Ramiz Məmmədov, AMEA Rəyasət Heyəti aparatının Beynəlxalq əlaqələr idarəsinin rəisi, b.ü.f.d. Esmira Əlirzayeva iştirak ediblər.  

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.