Azərbaycan Milli Elmlər Akademiyası

AMEA-nın akademik Əli Quliyev adına Aşqarlar Kimyası İnstitutunda (AKİ) Azərbaycan-Fransız Universitetinin (UFAZ) nümayəndələri ilə görüş keçirilib.

Görüşdə institutun direktoru, akademik Vaqif Fərzəliyev, elmi işlər üzrə direktor müavini, k.e.d., dosent Əfsun Sucayev, UFAZ-ın elmi araşdırmalar depatamentinin rəhbəri, professor Filip Turek, icraçı direktoru Vazeh Əskərov və baş katib Elizaveta Bydanova iştirak ediblər.

Akademik Vaqif Fərzəliyev qonaqlara institutun yaranma tarixi, əsas elmi istiqamətləri, əldə etdiyi nəticələr, yüksəkixtisaslı kadr hazırlığı, beynəlxalq əməkdaşlıq, dünyanın aparıcı elm mərkəzləri ilə yerinə yetirilən müştərək beynəlxalq tədqiqatlar haqqında geniş məlumat verib.

Sonra UFAZ-ın icraçı direktoru Vazeh Əskərov təmsil etdiyi universitetin fəaliyyəti haqqında məlumat verərək bildirib ki, əsas məqsədləri mükəmməl və beynəlxalq səviyyəli universitet qurmaq, həm Fransa, həm də Azərbaycan üçün qarşılıqlı faydalı, yüksək səviyyəli, uzun-müddətli elmi-texniki əməkdaşlıq yaratmaq və inkişaf etdirmək, Azərbaycanda ali təhsil sistemində edilən islahatları təşviq etmək, elm və yüksək texnologiyalar sahəsində fransız və ingilisdilli yüksəkixtisaslı işçi qüvvəsi yaratmaqdır.

UFAZ-ın nümayəndələri, həmçinin AMEA-nın institutları ilə birgə elmi-tədqiqat işləri və informasiya mübadiləsinin aparılması, tələbələrin elmi işə cəlb olunmaları, onlarda tədqiqatçılıq və peşə fəaliyyəti üçün zəruri olan praktiki vərdişlərin formalaşdırılması istiqamətində perspektivlərdən söz açıb, əməkdaşlıq imkanlarını müzakirə ediblər.

Sonda ikitərəfli əməkdaşlıq perspektivləri barəsində UFAZ-ın yeni yaradılmış elmi araşdırmalar departamenti ilə AKİ-nin gələcək layihələrinin həyata keçirilməsi, eləcə də universitetin bakalavr və magistrantlarının institutun laboratoriyalarında təcrübəyə cəlb edilməsi məsələsi müzakirə olunub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.