Azərbaycan Milli Elmlər Akademiyası

AMEA Mərdəkan Dendrarisində Gənc alim və mütəxəssislər şurasının təsis yığıncağı keçirildi.

Tədbirdə institutun Elmi Şurasının üzvləri və gənc mütəxəssislər iştirak edirdilər.

Yığıncağı giriş sözü ilə açan institutun direktoru, AMEA-nın müxbir üzvü Tofiq Məmmədov dendraridə yaradılacaq yeni şura haqqında məlumat verdi. 

AMEA Rəyasət Heyətinin Gənc alim və mütəxəssislər şurasının yaradılması haqqında 17 oktyabr 2013-cü il tarixli qərarını xatırladan alim şuranın məqsəd və vəzifələrindən danışdı, gənclərin elmə cəlb olunması istiqamətində görülən işlərdən söz açdı. Bildirdi ki, Azərbaycan elminin gələcək inkişafı gənc kadrların potensialından asılıdır. T.Məmmədov şura üzvlərinin maraqlı layihələr və yeni fikirlər irəli sürərək dünyanın nüfuzlu universitetləri, elmi-tədqiqat müəssisələri ilə sıx elmi əməkdaşlıq əlaqələri yaradacağına, AR Prezidenti yanında Elmin İnkişafı Fondunun Qrant layihələrində yaxından iştirak edəcəyinə ümidvar olduğunu bildirdi.

Son zamanlar AMEA-da bir çox elmi islahatların aparıldığını söyləyən institutun elmi işlər üzrə direktor müavini, biologiya üzrə fəlsəfə doktoru Zümrüd Məmmədovaşuranın yaradılmasını gənc alim və mütəxəssislərə olan diqqətin nəticəsi kimi qiymətləndirdi. Qeyd etdi ki, biliklər cəmiyyətinin qurulması Azərbaycan 2020: Gələcəyə baxış” İnkişaf konsepsiyasında müasir Azərbaycanın strateji inkişaf xətti olaraq müəyyənləşdirilmişdir. O, gənclərin ölkənin ictimai-siyasi həyatında yaxından iştirakı üçün lazımi şəraitin yaradıldığını vurğuladı. 

Sonra səsvermə yolu yeni təsis olunan şuranın üzvləri seçildi. Tərkibi 14 nəfərdən ibarət olan şuranın sədri “Bitki ekologiyası” laboratoriyasının aparıcı elmi işçisi, biologiya üzrə fəlsəfə doktoru Zaman Məmmədov, sədr müavini “Dendroxronologiya” labotaroriyasının böyük elmi işçisi Samirə Bağırova, katibFəxridəxanım Rüstəmova seçildilər.

Yeni sədr Z.Məmmədov şura üzvlərini təbrik etdi, seçilən tərkibin etimadı doğruldacağına və Azərbaycan elminin inkişafına öz töhvəsini verəcəyinə əminliyini ifadə etdi.