Azərbaycan Milli Elmlər Akademiyası

Dekabrın 1-də AMEA-nın Respublika Seysmoloji Xidmət Mərkəzinin (RSXM) Monitorinq Mərkəzində Türkiyə Respublikası Daxili İşlər Nazirliyinin Təbii Fəlakət və Fövqəladə Hallar Agentliyinin (AFAD) sədrinin köməkçisi İsmayıl Palakoğlunun rəhbərlik etdiyi nümayəndə heyəti ilə görüş keçirilib.

Görüşdə Türkiyə tərəfindən AFAD-ın başqan yardımçısı İsmayıl Palakoğlu, Zəlzələ Departamentinin rəhbəri Murat Nurlu,  Zəlzələ Departamentinin şöbə müdiri Vedat Özsaraç və şöbənin əməkdaşı Önder Gödez iştirak ediblər.

Azərbaycan tərəfindən AMEA-nın vitse-prezidenti, İnformasiya Texnologiyaları İnstitutunun baş direktoru, akademik Rasim  Əliquliyev, RSXM-nin baş direktoru, AMEA-nın müxbir üzvü Qurban Yetirmişli, RSXM-nin baş direktorunun elmi işlər üzrə müavini, texnika üzrə fəlsəfə doktoru, dosent Rauf Muradov və mərkəzin müvafiq şöbələrinin rəhbərləri iştirak ediblər.

Görüşdə akademik Rasim  Əliquliyev Azərbaycan və Türkiyənin qardaş ölkələr olduğunu qeyd edərək bildirib ki, bütün sahələrdə olduğu kimi, zəlzələlərin tədqiqatı və öyrənilməsi istiqamətində də ölkələrimiz arasında sıx əməkdaşlığın qurulması vacibdir. Həm Azərbaycanın, həm də Türkiyənin ərazisinin seysmik baxımdan aktiv bölgələrdə olduğunu qeyd edən akademik R.Əliquliyev geniş əməkdaşlıq üçün hər iki tərəfdə böyük imkanların və potensialın olduğunu diqqətə çatdırıb: “Ölkələrimiz arasında yaranmış son reallıq bizim hər bir məsələdə bir olmağımızı vacib edir. Əminəm ki, AFAD və RSXM arasındakı əməkdaşlığın genişlənməsi sayəsində təbii fəlakətlər və zəlzələlərin öyrənilməsi sahəsində daha böyük nəticələr əldə olunacaq”.

“Azərbaycanın sevinci sevincimiz, kədəri kədərimizdir”, - sözləri ilə çıxışına başlayan AFAD-ın sədrinin köməkçisi İsmayıl Palakoğlu bildirib ki, dünyanın heç bir ölkəsi təbii fəlakətlərdən sığortalanmayıb. “Həm Türkiyədə, həm də qardaş Azərbaycanda da təbii fəlakətlər və zəlzələlər olur. Bizim bu səfərimizin əsas məqsədi odur ki, biz bu sahələrdə əməkdaşlığımızı daha da genişləndirək”, - deyən İ.Palakoğlu Respublika Seysmoloji Xidmət Mərkəzinə zəlzələlərin öyrənilməsi sahəsində hər cür dəstək verməyə hazır olduqlarını qeyd edib: “Biz bilirik ki, azərbaycanlı qardaşlarımızın bu sahədə böyük və uğurlu işləri var. Biz də öz tərəfimizdən istər seysmik stansiya məlumatlarının ötürülməsi, istər təcrübə mübadiləsinin aparılması, istərsə də seysmik stansiyaların quraşdırılması sahəsində Azərbaycan tərəfinə hər cür dəstək verməyə hazırıq”.

AFAD rəsmisi, həmçinin onu da deyib ki, Türkiyə tərəfi Azərbaycana Qarabağda quraşdırılacaq seysmik stansiyalarla bağlı dəstək göstərmək niyyətindədir. Bundan başqa, İ.Palakoğlu türkdilli dövlətlərin və region ölkələrinin seysmik mərkəzlərinin birgə təşkilatının yaradılmasının nəzərdə tutulduğunu qeyd edib. Onun sözlərinə görə, həmin təşkilat çərçivəsində əməkdaşlıq və birgə tədqiqatların aparılması regionun seysmik vəziyyəti ilə bağlı daha yaxşı nəticələrin əldə olunmasına səbəb ola bilər.

Sonra Seysmoloji Mərkəzin baş direktoru, AMEA-nın müxbir üzvü Qurban Yetirmişli bildirib ki, hazırda mərkəz qardaş Türkiyənin Kocaeli, Sakarya universitetləri, Boğaziçi Universitetinin Kandilli Rəsədxanası və Türkiyə DİN-nin Təbii Fəlakətlər və Fövqəladə Hallar Agentliyinin Zəlzələ Departamenti ilə yaxından əməkdaşlıq edir. Türkiyə və Azərbaycan seysmoloqları arasında təcrübə və məlumat mübadiləsinin aparıldığını qeyd edən baş direktor qardaş ölkə tərəfindən hər zaman Azərbaycana dəstək göstərildiyini söyləyib: “Ulu öndərimizin də dediyi kimi, biz “Bir millət, iki dövlətik”. Hər bir sahədə bir yerdəyik. Əminəm ki, bu səfər əməkdaşlığımızın və birgə layihələrin həyata keçirilməsinə öz müsbət töhfələrini verəcək”.   

Görüşdə RSXM-nin Zəlzələ ocaqlarının dinamikası şöbəsinin müdiri, geologiya-mineralogiya üzrə fəlsəfə doktoru, dosent Səbinə Kazımova  Respublika Seysmoloji Xidmət Mərkəzində aparılan kompleks seysmoloji tədqiqatlar, seysmik stansiyalar şəbəkəsinin fəaliyyəti və yeni açılan seysmik stansiyalar, aparılmış elmi tədqiqatların nəticəsinə dair təqdimatla çıxış edib.

Türkiyə tərəfindən AFAD-ın Zəlzələ Departamentinin rəhbəri Murat Nurlu hazırda qardaş ölkədə aparılan seysmoloji tədqiqatlar və seysmik stansiyaların məlumatları əsasında alınmış nəticələr, tikinti sahələrində seysmikliyin qiymətləndirilməsi istiqamətində görülən işlər haqqında danışıb. AFAD-ın Zəlzələ Departamentinin şöbə müdiri Vedat Özsaraç isə məlumat mübadiləsi və birgə tədqiqatların aparılması sahəsində perspektiv layihələrə dair təqdimatla çıxış edib.

Sonda qonaqlara hədiyyələr təqdim olunub və xatirə şəkili çəkilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.