Azərbaycan Milli Elmlər Akademiyası

Azərbaycanın Rusiyadakı səfirliyi və Heydər Əliyev Fondunun Rusiya Federasiyasındakı nümayəndəliyi Azərbaycan xalqının Ümummilli Lideri Heydər Əliyevin anadan olmasının 99-cu ildönümünə həsr edilmiş “Qloballaşan dünyada mədəniyyətlər dialoqu mədəniyyəti” kitabının təqdimat mərasimini keçirib.

Vəsait AMEA-nın Fəlsəfə və Sosiologiya İnstitutunun Rusiya Federasiyasının bir sıra aparıcı təhsil və tədqiqat institutları ilə birgə hazırlanıb, Heydər Əliyev Fondunun Rusiya nümayəndəliyinin və Azərbaycan Respublikasının Rusiyadakı səfirliyinin dəstəyi ilə nəşr edilib. Kitabda Fəlsəfə və Sosiologiya İnstitutunun elmi əməkdaşlarından İlham Məmmədzadə, Rəna Mirzəzadə, Eynulla Mədətli, Ziba Ağayeva, Lalə Mövsümova, Sakit Hüseynov, Rövşən Hacıyev, Elvin Talışinski və Hafizə İmanovanın məqalələri yer alıb.

Tədbirdə Rusiyanın görkəmli ictimai-siyasi xadimləri və alimləri, Heydər Əliyevin müxtəlif dövrlərdə onunla işləmiş məsləkdaşları, Azərbaycan diasporunun nümayəndələri, Heydər Əliyev Fondunun Rusiyadakı nümayəndəliyinin əməkdaşları, Özbəkistan, Moldova, Türkiyə, Belarus, Qazaxıstan, Qırğızıstan, Türkmənistan və Cibutinin Rusiyadakı səfirliklərinin yüksək vəzifəli nümayəndələri iştirak edib.

Tədbiri açan Azərbaycanın Rusiyadakı səfiri Polad Bülbüloğlu Azərbaycan xalqının dahi oğlunun zəngin həyat yolu, sovet dönəmində Azərbaycanın rəhbəri olan Ümummilli Liderin görkəmli xidmətləri, respublikamızı 15 müttəfiq respublika arasında bütün göstəricilər üzrə ən qabaqcıl və mühüm respublikalar sırasında çıxarmağa nail olması barədə söhbət açıb. P.Bülbüloğlu vurğulayıb ki, 1993-cü ildə tamamilə yeni şəraitdə, dağıntı, xaos və böhran məqamında ölkə rəhbərliyinə qayıtmış Heydər Əliyev öz müdrikliyi, zəngin həyat təcrübəsi və yüksək nüfuzu sayəsində respublikanı tamamilə başqa səviyyəyə qaldırmağa nail olub, bugünkü Azərbaycanın işğal edilmiş ərazilərini geri qaytarmağa və qaytarılmış ərazidə quruculuq işinə başlamağa imkan vermiş inkişafın təməlini yaradıb.

Polad Bülbüloğlu təqdim olunan kitab barədə qonaqları məlumatlandıraraq qeyd edib ki, bu nəşr Heydər Əliyev Fondunun Rusiyadakı nümayəndəliyinin dəstəyi ilə artıq dördüncü dəfə keçirilən beynəlxalq elmi konfransın materialları əsasında hazırlanıb. Fond özünün bütün təşəbbüslərində daim Ulu Öndər Heydər Əliyevin bizə vəsiyyət etdiyi - dünyada baş verən proseslərə diqqət yetirmək və onları fəlsəfi baxımdan dərk etmək, müxtəlif ölkələrdən olan alimlərin və elm xadimlərinin fikirlərinə həssas yanaşmaq ideyalarını əsas götürür. Təsadüfi deyil ki, təqdim edilən məqalələr toplusunda Azərbaycan alimləri ilə yanaşı, Rusiya və Özbəkistan alimləri də geniş təmsil olunub.

“Qloballaşan dünyada mədəniyyətlər dialoqu mədəniyyəti” kitabının tərtibçisi, fəlsəfə elmləri doktoru, professor İbrahim Məlikov çıxışında sözügedən vəsaitin yaranma tarixi barədə məlumat verib, mədəniyyətlər dialoqunun və müasir aləmdə onların qarşılıqlı təsirinin əhəmiyyətini vurğulayıb.

Sonra çıxış edən fəlsəfə elmləri doktoru, Başkortostan Elmlər Akademiyasının akademiki, professor, Ufa Federal Tədqiqat Mərkəzinin Sosial-İqtisadi Araşdırmalar İnstitutunun baş elmi işçisi Fanil Fayzullin Heydər Əliyev şəxsiyyətinin möhtəşəmliyini vurğulayaraq onun milli münasibətlər məsələlərinə dərindən bələd olmasını və yarana biləcək problemlərdən qacınmaq üçün müxtəlif xalqların qarşılıqlı münasibətlərinə ehtiyatla və ciddi yanaşmağın zəruri olduğunu qeyd edib.

Fəlsəfə elmləri doktoru, Rusiya Daxili İşlər Nazirliyinin V.Y.Kikotya adına Moskva Universitetinin Fəlsəfə kafedrasının professoru Vitali Belski Ümummilli Lider Heydər Əliyevin və Prezident İlham Əliyevin müdrikliyi sayəsində son 30 ildə Azərbaycanın keçdiyi dövlətçilik yolunu qeyd edərək vurğulayıb ki, Azərbaycanın bugünkü inkişafının təməli Ulu Öndər Heydər Əliyev tərəfindən qoyulub.

Daha sonra çıxış edən fəlsəfə elmləri doktoru, V.M.Lomonosov adına Moskva Dövlət Universitetinin professoru Aleksandr Çumakov vurğulayıb ki, Sovet İttifaqı dağılandan sonra bütün sovet məkanında, ilk növbədə, mədəniyyət sahəsində ciddi sarsıntı yaşanıb. O, mənəvi və mədəni irsin qorunub saxlanmasında Heydər Əliyevin rolunu xatırladaraq qeyd edib ki, Ümummilli Liderin ideyaları bu gün uğurla həyata keçirilir və bu baxımdan, Heydər Əliyev Fondunun Rusiyadakı nümayəndəliyinin işi xüsusi qeyd edilməlidir.

AMEA-nın Fəlsəfə və Sosiologiya İnstitutunun icraçı direktoru Eynulla Mədətli öz çıxışında görkəmli dövlət xadimi Heydər Əliyevin Azərbaycan tarixində xidmətlərini qeyd edib, Prezident İlham Əliyevin rəhbərliyi ilə Vətən müharibəsində ölkəmizin qələbəsinin və işğal edilmiş torpaqların azad edilməsinin tarixi əhəmiyyətini vurğulayıb. Daha sonra Eynulla Mədətli “Qloballaşan dünyada mədəniyyətlər dialoqu mədəniyyəti” kitabı haqqında fikirlərini bölüşüb.

Tədbirin rəsmi hissəsindən sonra qonaqlar üçün ziyafət təşkil edilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.