Azərbaycan Milli Elmlər Akademiyası

İyunun 7-də AR Elm və Təhsil Nazirliyinin Fizika İnstitutunda Nyu-York Elmlər Akademiyasının həqiqi üzvü, AMEA-nın müxbir üzvü, ölkəmizdə fizika elminin inkişafında mühüm xidmətləri olan görkəmli alim Zöhrab Vəliyevin 70 illik yubileyinə həsr olunan tədbir keçirilib.

Tədbirdə AMEA-nın prezidenti, akademik İsa Həbibbəyli, AMEA-nın birinci vitse-prezidenti v.i.e., Fizika İnstitutunun baş direktoru, akademik Arif Həşimov, həmin müəssisənin əməkdaşları və mərhum alimin ailə üzvləri iştirak ediblər.

Tədbirdən öncə AMEA-nın prezidenti, akademik İsa Həbibbəyli Fizika İnstitutunda Ümummilli Lider Heydər Əliyevin xatirəsinə həsr olunmuş muzeyi, akademik Həsən Abdullayevin xatirə otağını ziyarət edib, həmçinin müəssisənin tarixini əks etdirən stendlərlə tanış olub.

Giriş nitqi ilə çıxış edən akademik Arif Həşimov tədbirin AMEA rəhbərliyinin təşəbbüsü ilə keçirildiyini bildirib. Qeyd edib ki, Zöhrab Vəliyev ali təhsilini M.V.Lomonosov adına Moskva Dövlət Universitetinin Fizika fakültəsində alıb, 1977-1986-cı illərdə Azərbaycan SSR EA-nın Fizika İnstitutunda, 1986-cı ildən ömrünün sonunadək isə Naxçıvan Dövlət Universitetində (NDU) müxtəlif vəzifələrdə çalışıb. A.Həşimov bugünlərdə Naxçıvan Dövlət Universitetində Zöhrab Vəliyevlə bağlı keçirilən tədbirdə iştirakı barədə də məlumat verib, alimin daim zəngin həyatı və elmi yaradıcılığı ilə xatırlanacağını söyləyib.

Sonra çıxış edən AMEA-nın prezidenti, akademik İsa Həbibbəyli görkəmli fizik alim Zöhrab Vəliyevlə uzun illər Naxçıvan Dövlət Universitetində birgə çalışdığını, onun tədqiqatları və müəllifi olduğu məqalələrlə, eləcə də kadr hazırlığı sahəsindəki fəaliyyəti ilə ölkəmizdə fizika elminin inkişafına mühüm töhfələr verdiyini deyib. Həmçinin bildirib ki, Zöhrab Vəliyev Universitetdə çalışdığı illərdə bu ali təhsil ocağının fəaliyyətinin təkmilləşdirilməsi, müasir standartlara uyğun qurulması, elmi-texniki bazasının gücləndirilməsi, yüksəkixtisaslı kadr hazırlığı istiqamətində yorulmaz fəaliyyəti ilə seçilib. Qeyd edib ki, ölkə başçısının 5 iyun 2023-cü il tarixli qərarı ilə təsdiq edilmiş “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nda Naxçıvan Dövlət Universiteti ilə bağlı maddələrin də yer alması vaxtilə Zöhrab Vəliyevin NDU-da başladığı işlərin həyata keçirilməsində mühüm rol oynayacaq.

Alimin şəxsi keyfiyyətlərinə də toxunan akademik İsa Həbibbəyli onun ideal ailə başçısı, məsuliyyətli, səmimi və mehriban bir insan, dost, yorulmaz tədqiqatçı olduğunu, öz tələbələrinə diqqət və qayğı ilə yanaşdığını bildirib.

Tədbirdə, həmçinin AMEA-nın vitse-prezidenti, akademik İradə Hüseynova, AMEA-nın müxbir üzvü Vəli Hüseynov, Fizika İnstitutunun laboratoriya müdirləri akademik Cavad Abdinov, AMEA-nın müxbir üzvü Səlimə Mehdiyeva, fizika-riyaziyyat elmləri doktoru Mirbaba Babayev və şöbə müdiri, fizika üzrə fəlsəfə doktoru Eldar Həsənov çıxış edərək alimlə bağlı xatirələrini bölüşüb, onun yüksək elmi potensiala malik olmasından, ölkəmizdə fizika elminin inkişafındakı xidmətlərindən, insani keyfiyyətlərindən danışıb, qısa ömründə yaratdığı zəngin elmi irsi ilə daim qəlblərdə yaşayacağını söyləyiblər.

Daha sonra görkəmli alimin ailəsi adından oğlu Əhməd Vəliyev çıxış edərək tədbirin təşkilatçılarına və iştirakçılarına minnətdarlığını bildirib.

Sonda çıxış edən akademik İsa Həbibbəyli tədbirdə səsləndirilən fikirlərlə alimin həyatı və yaradıcılığının yeni məqamlarına işıq salındığını söyləyib, xeyirxahlığı və yaxşı əməlləri ilə xatırlanan Zöhrab Vəliyevin daim qəlblərdə yaşayacağını deyib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.