Naxçıvan Dövlət Universitetində professor Zöhrab Vəliyevin 70 illik yubileyinə həsr olunmuş tədbir keçirilib.
“50 illik ömrün fizika elminə verdiyi töhfə” adlı tədbirdə AMEA-nın müxbir üzvü Zöhrab Vəliyevin əziz xatirəsi bir dəqiqəlik sükutla yad edilib.
Universitetin rektoru Elbrus İsayev qeyd edib ki, Zöhrab Vəliyevin elmi-tədqiqatlarının mühüm hissəsi Naxçıvan Dövlət Universiteti ilə bağlı olub. Fizika elminin inkişafında xüsusi xidmətləri olan Zöhrab müəllimin əməyi hər zaman dövlətimiz tərəfindən qiymətləndirilib. Belə ki, bu gün keçirilən tədbir Azərbaycan Milli Elmlər Akademiyasının təşkilatçılığı və dəstəyi ilə həyata keçirilir. Rektor Zöhrab müəllimin elmi-pedaqoji fəaliyyəti barədə danışıb. Öz sadəliyi, səmimiliyi ilə seçilən Zöhrab Vəliyevin həqiqi bir alim, dəyərli bir insan olduğu vurğulanıb. Elbrus İsayev bildirib ki, alimin yetirmələri bu gün Naxçıvan Dövlət Universitetində elmi-pedaqoji fəaliyyətlə məşğuldurlar. Diqqətə çatdırılıb ki, ali təhsil ocağının Fizika-riyaziyyat fakültəsində onun adını daşıyan laboratoriya fəaliyyət göstərir. Alimin qısa ömründə Azərbaycan elminə verdiyi töhfələri diqqətə çatdıran rektor Zöhrab müəllimin yüksək elmi göstəriciləri ilə bərabər insani keyfiyyətlərə məxsus olduğunu diqqətə çatdırıb. Biz fəxr edirik ki, belə gözəl alimdən və dəyərli insandan dərs almışıq, onun həyat və fəaliyyəti bizə nümunə olub. Alimin nə qədər insani keyfiyyətlərə sahibdirsə, o hər zaman qəlblərdə və yaddaşlarda yaşayır-deyən Elbrus İsayev Zöhrab müəllimin hər zaman qəlblərdə yaşayacağına əminliyini ifadə edib.
Tədbirdə Azərbaycan Milli Elmlər Akademiyasının hazırladığı videoçarx nümayiş olunub.
Azərbaycan Respublikası Elm və Təhsil Nazirliyi Fizika İnstitutunun baş direktoru, akademik Arif Həşimov Zöhrab Vəliyevin elmi fəaliyyətindən söhbət açaraq alimin elmi jurnalllarda çap olunan məqalələrindən danışıb. Zöhrab müəllimin yazdığı məqalələrin xüsusilə müasir dövrlə səsləşdiyini vurğulayan akademik diqqətə çatdırıb ki, Zöhrab Vəliyev nəzəriyyə ilə təcrübəni vəhdətdə aparan alim idi.
AMEA-nın Naxçıvan Bölməsinin sədri, akademik İsmayıl Hacıyev alimin yüksək elmi potensiala malik olduğunu çəkdiyi nümunələrlə əsaslandırıb. Akademik öz işinə olan sonsuz məsuliyyətini qeyd edərək Zöhrab müəllimin, həmçinin ideal ailə başçısı, səmimi və mehriban bir insan olduğunu bildirib.
AMEA-nın vitse-prezidenti, akademik İradə Hüseynova çıxış edərək o dövrdə Zöhrab Vəliyevin Moskva Dövlət Universitetində təhsil alması, Fizika İnstitutunda işləməyə başlamasını yüksək qiymətləndirib, alimin gənc yaşlarında qazandığı uğurları xüsusilə qeyd edib. Akademik vurğulayıb ki, böyük alimlər zamanı, elmi qabaqlayırlar, Zöhrab müəllim də məhz zamanı qabaqlayan ziyalılarımızdan olub.
Naxçıvan Müəllimlər İnstitutunun rektoru Azad Novruzov, Naxçıvan Universitetinin rektoru Anar Kazımov Zöhrab müəllimin tələbələri olaraq çıxış ediblər. Onlar Zöhrab Vəliyevlə bağlı xoş xatirələrini bölüşüblər. Çıxışlarda “Biz Zöhrab müəllimdən elm, təhsil öyrənməklə bərabər əsl insanlıq öyrənmişik”, - deyə fikirlər səsləndirilib. Çıxış edənlər bildiriblər ədalətli müəllim obrazının təcəssümü kimi qiymətləndirilən Zöhrab müəllimin əziz xatirəsi qəlbimizdə daim yaşayacaq.
Ümumi və nəzəri fizika kafedrasının dosenti, Zöhrab Vəliyevin dissertantı olmuş Nailə Qardaşbəyova Zöhrab Vəliyev haqda məlumat verib.
Vəliyev Zöhrab Əhməd oğlu 1953-cü il iyunun 4-də Naxçıvan şəhərində anadan olmuşdur. M.V.Lomonosov adına Moskva Dövlət Universitetini fizika ixtisası üzrə bitirmişdir. 2003-cü ildə AMEA-nın müxbir üzvü seçilmişdir. Z.Vəliyev Naxcıvan Dövlət Universitetində dekan, elmi işlər üzrə prorektor vəzifələrində çalışmışdır.
Zöhrab müəllimin əsas elmi tədqiqatları xarici elektrik, klassik və kvantlayıcı maqnit sahələrində qıraq yüklü dislokasiyalı yarımkeçiricilərin elektrik, fotoelektrik və optik xassələrinin ardıcıl nəzəriyyəsinin qurulması; elektron və deşik keçiriciliyinə malik yarımkeçirici kristallarda hərəkət edən yüklü dislokasiyaların modelinin verilməsi və onun əsasında deformasiya lüminesensiya hadisəsinin, elektronların dinamik həyəcanlaşma effektinin, dislokasiya xarakterli sövq cərəyanlarının araşdırılmasıdır.
Alim 24-ü xaricdə olmaqla 93 elmi əsərin müəllifidir. Onun rəhbərliyi altında 1 fəlsəfə doktoru dissertasiya müdafiə edilmişdir. “Web of Science”, “Scopus” və s. beynəlxalq bazalarda indeksləşən jurnallarda dərc olunan 17 əsəri olmuşdur. AMEA-nın müxbir üzvü Zöhrab Vəliyev 2003-cü ildə vəfat etmişdir.
Sonda alimin ailə üzvlərindən qardaşı çıxış edərək Zöhrab Vəliyevin yubileyinin keçirilməsində dəstəyi olan hər kəsə minnətdarlıq ifadə edib.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.