Azərbaycan Milli Elmlər Akademiyası

M.V.Lomonosov adına Moskva Dövlət Universitetinin bir qrup əməkdaşı Elm və Təhsil Nazirliyinin akademik H.Əliyev adına Coğrafiya İnstitutunda olub.

İnstitutun baş direktoru, professor Zakir Eminov qonaqları salamladıqdan sonra Coğrafiya İnstitutunun fəaliyyəti və aparıcı alimləri haqqında tanışlıq verib.

Moskva Dövlət Universitetinin Coğrafiya fakültəsinin Təbiətdən rasional istifadə kafedrasının müdiri, coğrafiyaşünas alim, professor Mixail Viktoroviç Slipençuk həmmüəllif olduğu “XX əsrin Kolumbu” və “Andrey Kapitsa” kitabları haqqında təqdimatla çıxış edib. 9-cu Bakı Beynəlxalq Kitab Sərgisində nümayiş etdirilən bu kitablar uzun illər MDU coğrafiya fakültəsinin kafedra müdiri işləmiş, Uzaq Şərq Elmi Mərkəzinin sədri, məşhur fizik, akademik Pyotr Kapitsanın oğlu, SSRİ EA-nın müxbir  üzvü Andrey Petroviç Kapitsanın həyatı, elmi, ictimai və təşkilati fəaliyyətinə həsr edilib. Müəllif çıxışında A.Kapitsanın Antraktidanın tədqiqindəki böyük rolundan danışıb və hətta onu kitabın adındakı kimi, XX əsrin Kolumbu adlandırıb.

Tədbirdə iştirak edən coğrafiya üzrə elmlər doktoru, professor Çingiz İsmayılov Antraktidanın ilk xəritəsinin hələ 12-ci əsrdə ərəb coğrafiyaçı səyyahı Əli Mənsuri Əl-İdrisi tərəfindən tərtib edildiyini diqqətə çatdırıb.

Coğrafiya İnstitutunun şöbə müdiri, coğrafiya elmləri doktoru, professor Rza Mahmudov,  coğrafiya elmləri doktoru Starə Tarixazər, elmi işçi Zülfəli Rəsulov və digərləri mövzu ilə bağlı fikirlərini bildiriblər, Antraktida ilə bağlı institutda görülən işlər barədə qonaqlara məlumat veriblər.

Sonda baş direktor Zakir Eminov M.Slipençuka maraqlı məruzəsinə və instituta bağışladığı kitablara görə təşəkkürünü bildirib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.