Azərbaycan Milli Elmlər Akademiyası

Azərbaycanın ilk veb saytı (1995)

ANA SƏHİFƏ  >>  XƏBƏRLƏR  >>  NƏŞRLƏR

“Azərbaycanda rəqəmsal transformasiya – 2023” bülleteni çap olunub
16.04.2024 14:02
  • A-
  • A
  • A+

“Azərbaycanda rəqəmsal transformasiya – 2023” bülleteni çap olunub

Elm və Təhsil Nazirliyinin İqtisadiyyat İnstitutunun “İnnovativ iqtisadiyyat və rəqəmsal transformasiya” şöbəsinin aparıcı elmi işçisi, iqtisad üzrə fəlsəfə doktoru Gülnarə Fətəliyevanın müəllifliyi ilə “Azərbaycanda rəqəmsal transformasiya - 2023” adlı bülleten işıq üzü görüb.

Nəşrin rəyçiləri dosentlər Allahyar Muradov və Mahir Zeynalov, elmi redaktoru iqtisad elmləri doktoru dosent Leyli Allahverdiyevadır. İqtisadiyyat İnstitutu Elmi şurasının qərarı ilə çap olunan bülletenin buraxılışı üçün məsul şəxs dosent Təbriz Yadigarovdur.

İqtisadiyyatın rəqəmsal mühitə transformasiyası yaşadığımız müasir dövrün başlıca müəyyənedici amillərindən hesab olunur. “Azərbaycanda rəqəmsal transformasiya - 2023” bülletenində respublikada iqtisadiyyatın rəqəmsal transformasiyası sahəsində dövlət tənzimlənməsinin əsas istiqamətləri, bu sahədə müasir vəziyyət verilmiş, onun inkişaf xüsusiyyətləri təhlil edilmişdir. Həmçinin rəqəmsal transformasiya ilə bağlı müxtəlif göstəriciləri əhatə edən indekslərə istinad edilməklə, Azərbaycan və ona qonşu ölkələrin mövqeyi ilə bağlı müqayisəli təhlillər aparılmış, ölkəmiz üçün güclü və zəif tərəflər müəyyənləşdirilmişdir. Sonda iqtisadiyyatın rəqəmsal transformasiyasının sürətləndirilməsi ilə bağlı ümumiləşdirmələr aparılmış, təklif və tövsiyələr verilib.

Bülletenin hazırlanması zamanı Azərbaycan Respublikasının Dövlət Statistika Komitəsinin və müxtəlif beynəlxalq təşkilatların - İqtisadi Əməkdaşlıq və İnkişaf Təşkilatının, Birləşmiş Millətlər Təşkilatının, Avropa Birliyinin, Beynəlxalq Telekommunikasiya İttifaqının, Dünya Bankının, Ümumdünya Əqli Mülkiyyət Təşkilatının hesabatlarından və statistik məlumatlarından istifadə olunmuşdur.

Analitik icmal iqtisadçılar, rəqəmsal transformasiya sahəsində qərar qəbul edənlər üçün nəzərdə tutulub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

  • Paylaş: