Azərbaycan Milli Elmlər Akademiyası

AMEA-nın Arxeologiya və Antropologiya İnstitutunda Əsir və itkin düşmüş, girov götürülmüş vətəndaşlarla əlaqədar Dövlət Komissiyası ilə birgə çalışan Beynəlxalq Qırmızı Xaç Komitəsinin (BQXK) əməkdaşları ilə görüş keçirilib.

Görüşü giriş sözü ilə açan institutun direktoru tarix üzrə fəlsəfə doktoru, dosent Fərhad Quliyev bildirib ki, Azərbaycanın işğaldan azad edilmiş ərazilərində itkin düşmüş insanların axtarışı, tapılmış insan qalıqlarının ekshumasiyası və sonrakı identifikasiyası sahəsində birgə əməkdaşlıq fəaliyyəti humanizmin təzahürü, ədalətin bərpa olunması və Azərbaycan həqiqətlərinin beynəlxalq səviyyədə tanıdılması baxımından təqdir edilməlidir. Eyni zamanda bu istiqamətdə əməkdaşlıq Azərbaycanda Məhkəmə arxeologiyasının formalaşması və bu sahədə çalışan gənc arxeoloq və antropoloqların ixtisaslaşması üçün geniş imkanlar açmışdır.

BQXK-nın əməkdaşı Uyum Vehit və  Natnipoon Rattanarungruang vaxtilə işğal altında olmuş Qarabağ və Şərqi Zəngəzur iqtisadi rayonlarının müxtəlif məntəqələrində AMEA-nın Arxeologiya və Antropologiya İnstitutunun mütəxəssisləri ilə əməkdaşlıqdan məmnunluqlarını bildiriblər.

BQXK-nın əməkdaşları AMEA Arxeologiya və Antropologiya İnstitutuna elmi metodiki vəsaitlər (hər bir antropoloqun stolüstü kitabı olan son redaktədə insan anatomiyası barədə atlaslar) və çöl tədqiqat işləri üçün lazım olan texniki vasitələri (su keçirməyən miqyas xətkeşləri, isti və soyuq mövsümlər üçün yataq kisələri, yük daşıma çantaları) hədiyyə etdilər.

Görüşdə qarşılıqlı əməkdaşlıq barədə planlar da müzakirə olundu.

Tədbirdə, həmçinin BQXK-nın əməkdaşı Nərmin Mirzəyeva və AMEA-nın Arxeologiya və Antropologiya İnstitutunun Məhkəmə arxeologiyası şöbəsinin müdiri t.ü.f.d., dosent Akif Quliyev iştirak ediblər.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.