Azərbaycan Milli Elmlər Akademiyası

Elm və Təhsil Nazirliyinin akademik H.Ə.Əliyev adına Coğrafiya İnstitutunun Beynəlxalq və ictimaiyyətlə əlaqələr şöbəsinin əməkdaşı, azərbaycandilli Vikipediyanın patrulu Aida Aslanova Vikipediya Günü münasibətilə Real TV-nin efirində çıxış edib.

O, çıxışında Vikipediyanın əhəmiyyəti, onun cəmiyyət üçün rolu və azərbaycandilli seqmentdə görülən işlər haqqında ətraflı məlumat verib. Vikipediyanın açıq bilik mənbəyi olaraq təhsildə, elmdə və informasiya cəmiyyətinin inkişafında mühüm yer tutduğunu vurğulayan Aida Aslanova, həmçinin Vikipediyanın Azərbaycan dilində inkişafı və məqalə keyfiyyətinin artırılması istiqamətində aparılan işlərdən də söz açıb.

Cİ əməkdaşı Vikipediyaya töhfə vermək istəyənlər üçün mövcud imkanlar, məqalə yazma və redaktə prinsipləri, eləcə də könüllü iştirakın vacibliyi barədə də danışıb, cəmiyyətin maarifləndirilməsi, biliklərin açıq şəkildə paylaşılması və Vikipediyanın inkişafına dəstək verilməsinin önəmini qeyd edib.

Sonda Aida Aslanova hər kəsi Vikipediyaya qoşulmağa, etibarlı və akademik mənbələrə əsaslanan məqalələr yaratmağa və açıq bilik məkanının inkişafına töhfə verməyə çağırıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.