Azərbaycan Milli Elmlər Akademiyası

Filologiya elmləri doktoru, professor, Əməkdar elm xadimi Həbib Babayevə həsr olunmuş “İşıq adam: Xalqa və elmə xidmət nümunəsi” adlı kitab çapdan çıxıb.

AMEA-nın Nizami Gəncəvi adına Ədəbiyyat İnstitutunun Elmi Şurasının qərarı ilə işıq üzü görən kitabın elmi redaktoru və hazırlayanı filologiya elmləri doktoru, professor Nizami Tağısoydur.

Kitabda elmi-nəzəri və pedaqoji fəaliyyətini, yaradıcı həyatını Azərbaycan ədəbiyyatşünaslıq elminin inkişafına, ali məktəb tələbələrinin zəngin biliklər qazanmasına həsr etmiş, çoxsaylı alimlər hazırlamış Həbib Babayevin ömür yoluna işıq tutulur. Eyni zamanda, böyük insanın və alimin elmi axtarışlarının müxtəlif tərəfləri tanınmış həmkarları, yetirmələri, dostları, qohumları tərəfindən dəyərləndirilir və oxuculara təqdim edilir.

Nəşrdə Yusif Rüstəmov, Pənah Xəlilov, Nizami Məmmədov Tağısoy, Telman Cəfərov (Vəlixanlı), Rafiq Novruzov, Safurə Quliyeva, İlahə Carçıyeva, İslam Ağakərimov, Seyfəl Həsənov, Mübariz Məmmədli, Fərrux Məmmədov, həmyerliləri Nuralı Çələbiyev, Svetlana Salamova və başqalarının alimlə bağlı kövrək xatirələri yer alıb, istedadlı şair Ramiz Heydərin professor Həbib Babayevin unudulmaz xatirəsinə həsr etdiyi "Bir ömrün rəngləri" poemasından fraqmentlər təqdim olunub.

AzərTac