Azərbaycan Milli Elmlər Akademiyası

Azərbaycan Milli Elmlər Akademiyası Məhəmməd Füzuli adına Əlyazmalar İnstitutunun Elmi şurasının qərarı ilə institutun elmi işlər üzrə direktor müavini, Əlyazmaların və əski çap kitablarının tərcüməsi şöbəsinin müdiri fil.ü.f.d., dosent Əkrəm Bağırovun fars dilindən tərcümə edib nəşrə hazırladığı “Nasirəddin Şah Qacarın qızları” kitabı çapdan çıxıb.

Kitab Qacarlar sülaləsinin (1795-1925) dördüncü hökmdarı Nasirəddin şahın 16 qızı haqqında çoxsaylı arxiv sənədləri əsasında qələmə alınmış əsərdir. Əsərin müəllifi Qacarlar dövrünün tanınmış tədqiqatçısı Fatimə Qazihadır. Əsli fars dilində olan bu əsər şah qızlarının həyatı fonunda dövrün ictimai-siyasi və ədəbi-mədəni həyatını dolğun şəkildə əks etdirir. Tarixçi alimlərlə yanaşı geniş oxucu kütləsi üçün nəzərdə tutulmuş bu kitabda tədqiqatçılar indiyə qədər açıqlanmamış, İran arxivlərində mühafizə olunan əlyazmalarda əksini tapmış olduqca maraqlı və çoxsaylı yeni faktlarla qarşılaşacaq.

Qeyd edək ki, kitabda yer alan öz sözün müəllifi fil.ü.f.d., dosent Əkrəm Bağırov, yeni nəşrin korrektoru Əyyar Tahirdir. Kitabın mətn yığımı Elmira Manafova və Könül Cəbrayılovaya məxsusdur.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.