Azərbaycan Milli Elmlər Akademiyası

Elm və Təhsil Nazirliyinin İqtisadiyyat İnstitutunun “Monetar və fiskal tənzimləmə problemləri” şöbəsinin müdiri, iqtisad elmləri doktoru Yaşar Məmmədovun müəllifliyi ilə “Müasir iqtisadiyyatın güzgüsü: fond bazarlarının dünya və Azərbaycan reallıqları” monoqrafiyası işıq üzü görüb.

İqtisadiyyat İnstitutunun Elmi şurasının qərarı ilə çapa tövsiyə edilən kitabın rəyçiləri Azərbaycan Respublikası Auditorlar Palatasının sədri, i.e.d., professor Vahid Novruzov, Odlar Yurdu Universitetinin Strateji inkişaf və beynəlxalq əlaqələr üzrə prorektoru, i.e.d. professor Elşad Məmmədov, elmi redaktoru, i.e.d., professor Gülşən Yüzbaşıyevadır.

Monoqrafiyada dünya və milli fond bazarlarının inkişaf istiqamətləri müasir iqtisadi transformasiyalar kontekstində təhlil olunur. Müəllif beynəlxalq bazarların iqtisadi artım, investisiya hərəkətləri və maliyyə sabitliyi ilə qarşılıqlı təsir mexanizmlərini nəzəri-metodoloji və faktlara əsaslanan yanaşma ilə qiymətləndirir. Tədqiqatda fond bazarının ölkə iqtisadiyyatına təsiri qlobal və regional bazar kapitallaşması göstəriciləri ilə müqayisəli şəkildə dəyərləndirilir, həmçinin bazarın effektivliyini məhdudlaşdıran əsas problemlər elmi-analitik çərçivədə müəyyən edilir. Bununla paralel olaraq, kapital axınlarının diversifikasiyası, bazar iştirakçılarının fəallığının artırılması və tənzimləmə mexanizmlərinin qabaqcıl beynəlxalq təcrübə ilə uzlaşdırılması üzrə elmi əsaslandırılmış və praktiki tətbiqə yararlı təkliflər irəli sürülür. Nəşr maliyyə bazarları sahəsində elmi tədqiqat aparan alimlər, analitiklər və mütəxəssislər, habelə müvafiq ixtisas üzrə təhsil alan tələbələr üçün etibarlı elmi-praktiki istinad mənbəyi kimi dəyərləndirilir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.