Azərbaycan Milli Elmlər Akademiyası

24-25 mart 2026-cı il tarixlərində Özbəkistanın Xarəzm vilayətinin mərkəzi Ürgənc şəhərində Urgənc Dövlət Pedaqoji İnstitutu, Əbu Reyhan Biruni adına Urgenç Dövlət Universiteti və “Türk Xalqı” beynəlxalq təşkilatı ilə birgə “İnnovasiyalar dövründə türk mədəni əməkdaşlığı: rəqəmsal platformalar və elmi mübadilələr” adlı beynəlxalq elmi-praktiki konfrans keçirilib.

Beynəlxalq konfransın açılışında  Xarəzm vilayətinin hakim müavini Nigora Kutlimuratova, Ürgənc Dövlət Universitetinin rektoru Feruza Madrahimova, “Türk Eli” beynəlxalq təşkilatının rəhbəri Sərvər İspahi və başqaları təbrik sözlərini bildiriblər.

Tədbirdə əsas məruzəçilərdən biri kimi iştirak edən AMEA Fəlsəfə və Sosiologiya İnstitutunun Türk xalqlarının fəlsəfi fikir tarixi və müasir fəlsəfəsi şöbəsinin müdiri, fəlsəfə üzrə fəlsəfə doktoru, dosent Faiq Ələkbərli “Çağdaş dövrdə Türk xalqlarında mədəni-fəlsəfi münasibətlər və Türk dövlətləri təşkilatı” mövzusunda məruzə edib. Faiq Ələkbərli bildirib ki, bir çox qaynaqlara da istinad etməklə, türk xalqları arasındakı münasibətlərin fəlsəfi, sosioloji ya da sosial-fəlsəfi yükü ortaya qoyulmalıdır. Başqa sözlə, türk xalqlarının həmkarlığının fəlsəfi, sosioloji və sosial-fəlsəfi yönlərini qabartmaq, onun əsas mahiyyətinin əxlaq, kültür, yaşam tərzi, dəyərlər, bir sözlə özünəməxsus mədəni-fəlsəfi dünyagörüşlə bağlı olduğunu göstərmək lazımdır.

Beynəlxalq elmi-praktik konfransda Özbəkistan, Türkiyə, Qırğızıstan, Azərbaycan, Tacikistan, Qazaxıstan, ABŞ, Rusiya və digər ölkələrdən 20-dən çox  alim iştirak edib. Onlar konfrans çərçivəsində Əbu Reyhan Biruni adına Ürgənc Dövlət Universiteti və Ürgənc Dövlət Pedaqoji İnstitutunun təşkilatçılığı Novruz bayramına həsr olunmuş festivalda da iştirak ediblər.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.