Azərbaycan Milli Elmlər Akademiyası

Azərbaycan gənclərinin milli kimlik, vətəndaşlıq məsuliyyəti və vətənpərvərlik ruhunda formalaşması dövlət və cəmiyyət üçün mühüm prioritetlərdəndir. Tarixi hadisələrin öyrənilməsi, milli-mənəvi dəyərlərin qorunması və gələcək nəsillərə ötürülməsi bu istiqamətdə əsas məsələlər sırasında yer alır.

Bu fikirləri açıqlamasında AMEA Gənclər Akademiyasının Rəqəmsal Mobillik Mərkəzinin rəhbəri, kimya üzrə fəlsəfə doktoru Günel Əzimova söyləyib. O bildirib ki, xüsusilə 2020-ci il Vətən müharibəsi Azərbaycan cəmiyyətində milli həmrəyliyin, vətəndaş fəallığının və gənclərin ictimai proseslərdə iştirakının mühüm nümunələrindən biri kimi yadda qalıb.

Müsahibimiz qeyd edib ki, müharibə dövründə Azərbaycan gənclərinin fəallığı yalnız hərbi səfərbərliklə məhdudlaşmayıb. Gənclər sosial və informasiya məkanında müxtəlif təşəbbüslərlə çıxış edib, rəqəmsal platformalardan istifadə etməklə Azərbaycanın mövqeyinin beynəlxalq auditoriyaya çatdırılmasına, tarixi məlumatların yayılmasına və informasiya mübadiləsinə töhfə veriblər. Ölkəyə və xalqa bağlılıq elm, təhsil, innovasiya, əmək və ictimai fəaliyyət vasitəsilə cəmiyyətin inkişafına töhfə verməklə də ifadə olunur. Bu baxımdan, gənclərin milli dəyərlərə bağlı, eyni zamanda, müasir elmi düşüncəyə və peşəkar bacarıqlara malik şəxsiyyətlər kimi yetişdirilməsi xüsusi əhəmiyyət daşıyır.

AMEA Gənclər Akademiyasının bu istiqamətdə fəaliyyətinə toxunan G.Əzimova bildirib ki, Akademiya gənc alim və tədqiqatçıların elmi fəaliyyətinin dəstəklənməsi, akademik əməkdaşlığın genişləndirilməsi və aktual ictimai məsələlərin elmi müstəvidə araşdırılması baxımından mühüm platformadır. Milli kimlik, tarixi yaddaş, vətəndaşlıq və vətənpərvərlik kimi mövzuların elmi araşdırılması müasir Azərbaycan gəncliyinin formalaşma xüsusiyyətlərinin daha sistemli şəkildə öyrənilməsinə imkan verir. Gənclər Akademiyası çərçivəsində aparılan elmi fəaliyyət tarixi hadisələrin yalnız təsviri ilə kifayətlənməməli, onların sosial, mənəvi və ictimai nəticələrinin də araşdırılmasına yönəlməlidir. Gənc tədqiqatçıların bu prosesə cəlb olunması yeni elmi yanaşmaların formalaşmasına, həmçinin tarixi yaddaşın elmi əsaslarla gələcək nəsillərə çatdırılmasına şərait yaradır. Elmi fəaliyyət milli yaddaşın qorunması ilə yanaşı, gənclərin tənqidi düşüncə, məsuliyyətli kommunikasiya və vətəndaşlıq şüurunun inkişafına da xidmət edir. 44 günlük Vətən müharibəsinin yaratdığı ictimai təcrübənin öyrənilməsi göstərir ki, gənclər cəmiyyətin yalnız gələcəyi deyil, həm də bu gününün fəal iştirakçılarıdır. Onların elmə, innovasiyaya, ictimai təşəbbüslərə və milli dəyərlərin qorunmasına verdiyi töhfə ölkənin davamlı inkişafında mühüm rol oynayır.

Müsahibimiz əlavə edib ki, Gənclər Akademiyasının əsas istiqamətlərindən biri gənc alimlərin potensialını vahid elmi mühitdə birləşdirmək, aktual mövzular üzrə tədqiqatları təşviq etmək və elmi nəticələrin cəmiyyətə çatdırılmasına imkan yaratmaqdır. Milli yaddaşın qorunması, vətənpərvərlik dəyərlərinin elmi əsaslarla öyrənilməsi və gənclərin ictimai fəallığının dəstəklənməsi bir-biri ilə sıx bağlı proseslərdir. Bu istiqamətdə Gənclər Akademiyası gənc tədqiqatçıların elmi fəaliyyətini təşviq etməklə yanaşı, milli-mənəvi dəyərlərə bağlı, müasir düşüncəli və cəmiyyət qarşısında məsuliyyətli gənc nəslin formalaşmasına da töhfə verir.

AzərTac