Azərbaycan Milli Elmlər Akademiyası

Bu gün AMEA Riyaziyyat və Mexanika İnstitutunda AMEA-nın vitse-prezidenti, Fizika-Riyaziyyat və Texnika Elmləri Bölməsinin akademik-katibi, akademik Akif Hacıyevin rəhbərliyi ilə “Orliç-Musilak fəzalarında subxətti operatorların məhdudluğu” mövzusunda seminar keçirildi.

İnstitutun Gənc alim və mütəxəssislər şurasının üzvlərinin iştirakı ilə keçirilən seminarda şuranın üzvü, fizika-riyaziyyat üzrə fəlsəfə doktoru Rövşən Bəndəliyev məruzə ilə çıxış etdi. Məruzədə çəkili Orliç-Musilak fəzasının bəzi struktur xassələri və bir sinif subxətti operatorların bu fəzada məhdudluğundan bəhs edildi.

Mövzu ətrafında geniş fikir mübadiləsi aparıldı.

Gənc alimlərdən fizika-riyaziyyat üzrə fəlsəfə doktoru Famil Seyfullayev, Cavanşir Həsənov, Lalə Əliyeva və başqaları mövzu ilə bağlı suallarla çıxış etdilər.