Azərbaycan Milli Elmlər Akademiyası

AMEA-nın Dendrologiya İnstitutunun dendrologiya.az saytının yeni dizaynda təqdimatı olub. Sayt müəssisənin İctimaiyyətlə əlaqələr şöbəsinin təşkilatçılığı ilə hazırlanıb.

İctimaiyyətlə əlaqələr şöbəsinin müdiri, saytın idarəçisi Tünzalə Zeyvəliyeva çıxışında müxtəlif elmi bölmələri, institut haqqında və biologiya elminə aid informasiyalardan ibarət zəngin videoqalereyanı özündə əks etdirən portalda elmin, təhsilin, mədəniyyətin, işğaldan azad olunan Qarabağın inkişafına dair elmi və analitik materialların hazırlanmasının qarşıya qoyulan məqsəd olduğunu vurğulayıb. O bildirib ki, bu günə kimi saytda elmin populyarlaşdırılması istiqamətində, eləcə də institutun fəaliyyəti, elmi nailiyyətləri, keçirdiyi tədbirləri əks etdirən videoçarxlar, Akademiyanın alim və mütəxəssislərinin aktual mövzularda müsahibələri işıqlandırılıb.

Dendrologiya İnstitutunun direktoru, AMEA-nın müxbir üzvü Tofiq Məmmədov isə qeyd edib ki, sayt Azərbaycanda dövlət tərəfindən elmdə aparılan islahatları, elmin inkişafı sahəsində əldə edilmiş nailiyyətləri obyektiv şəkildə işıqlandıran və təbliğ edən, AMEA-nın həyatında baş verən əlamətdar hadisələri, tarixi görüşləri əks etdirən dəyərli və etibarlı informasiya mənbəyidir. Onun sözlərinə görə, saytda dünya elminə böyük töhfələr bəxş etmiş azərbaycanlı alimlərin və xaricdə yaşayan görkəmli elm xadimlərimizin həyat və fəaliyyətinə dair məlumatlarla oxucular tanış ola bilər. İnstitut direktoru daha sonra öz tövsiyə və tapşırıqlarını verib.

Sonda müəssisənin İctimaiyyətlə əlaqələr şöbəsinin əməkdaşları Tünzalə Zeyvəliyeva və Elmar Zeynalov təltif olunublar.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.