Azərbaycan Milli Elmlər Akademiyası

İyulun 22-də Bakı Dövlət Universitetitinin nəzdində Tətbiqi Riyaziyyat Elmi-Tədqiqat İnstitutunun və Bakı Dövlət Universiteti Mexanika-riyaziyyat fakültəsinin əməkdaşlarının tərəfdaşı olduğu “HORİZON 2020” SOMPATY (Spectral Optimization: From Mathematics to Physics and Advanced Technology) layihəsi çərçivəsində  elmi vebinar keçirilib.

Vebinara layihənin direktoru Almaniyanın İlmenau Texniki Universitetinin professoru  Karsten Trunk sədrlik edib.

Tətbiqi Riyaziyyat Elmi-Tədqiqat İnstitutunun direktoru, AMEA Rəyasət Heyətinin üzvü, akademik Fikrət Əliyev vebinarda “Some mathematical problems and their solution for the problem of oscillatory systems with liquid dampers”  adlı plenar məruzə ilə çıxış edib. Qeyd edək ki, layihənin Azərbaycan tərəfdən direktoru akademik Fikrət Əliyevdir.

Məruzədən sonra seminar müzakirələr şəklində davam etdirilib. Lübek Universitetinin professoru Jürgen Prestin, Daşkənd Turin Politexnik Universitetinin professoru Davron Matrusulov, Praqa Doppler Riyazi Fizika və Tətbiqi Riyaziyyat İnstitutunun professoru Pavel Exner Fikrət Əliyevə suallar ünvanlayıblar və məruzəçi ona verilən sualları cavablandırıb.

Bu layihədə iştirak edən tədqiqat institutları, spektral optimallaşdırma və nano texnologiya, təbiət elmləri və kvant mexanikasında tətbiqetmə mövzusunda güclü bir araşdırma mərkəzinə sahibdirlər.

SOMPATY layihəsi çərçivəsində 2024-cü ilə kimi dörd layihə tədbiri (ildə bir dəfə) təyin edilib. Layihənin məqsədi Azərbaycan, Belarus, Çex Respublikası, Almaniya, Qazaxıstan, Ukrayna və Özbəkistanın universitetləri və tədqiqat təşkilatları arasında kadr mübadiləsi, birgə tədqiqat və təlim işlərinin aparılmasıdır. Bu layihə, Avropa ilə Müstəqil Dövlətlər Birliyi arasında tədqiqat əlaqələrinin daha da inkişaf etdirilməsinə yönəlib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.