AMEA-nın Nizami Gəncəvi adına Milli Azərbaycan Ədəbiyyatı Muzeyində Gənc Alim və Mütəxəssislər Şurasının təşkilatçılığı ilə Nizami Gəncəvinin anadan olmasının 880 illiyinə həsr olunan respublika gənclər konfransı keçirilib.
Tədbiri giriş sözü ilə muzeyin baş direktoru, akademik Rafael Hüseynov açaraq konfransın əlamətdar dövrə təsadüf etdiyini, Zəfər ilinin, Azərbaycan tarixində mühüm əhəmiyyət kəsb edən ilin Nizaminin adı ilə bağlı olduğunu vurğulayıb. Nizami irsinin nəşri, tərcüməsi və tədqiqinin müasir problemləri barədə fikirlərini bölüşən akademik R.Hüseynov klassik dövr Azərbaycan ədəbiyyatının araşdırılmasının hələ də öz aktuallığını saxladığını, müasir dövr ədəbiyyatımız və mədəniyyətimizlə yanaşı, orta əsrlər irsimizin də öyrənilməlməsinin vacibliyini bildirib.
Alim Nizaminin günümüzə gəlib çatan irsinin gənclərə və gələcək nəsillərə necə ötürülməli, aşılanmalı olduğu barədə qənaətlərini konfrans iştirakçılarının diqqətinə çatdırıb. Nizamişünaslığın tarixinin artıq bir neçə əsrə çatdığını söyləyən R.Hüseynov bu gün də görülməli işlərin olduğunu, Nizami Gəncəvi irsinə aid tərcümə və nəşrlərin qənaətbəxş olmadığını, ədibin dünyanın müxtəlif guşələrindən əlyazmalarının toplanması və elmi-tənqidi mətninin hazırlanmasına ciddi ehtiyac olduğunu bildirib.
Sonra tədbirə qonaq qismində dəvət olunan Əzizə Cəfərzadənin oğlu Turan İbrahimov çıxış edib. O, Əzizə Cəfərzadənin “Seçilmiş əsərləri”nin 12 cildliyinin işıq üzü gördüyünü, topluya daxil olan əsərlərinin bir qisminin təkrar nəşr olunduğunu, bəzilərinin isə ilk dəfə çap edildiyini vurğulayıb. Turan İbrahimov çoxcildliyin respublikanın aparıcı kitabxana və təşkilatlarına, o cümlədən Nizami Gəncəvi adına Milli Azərbaycan Ədəbiyyatı Muzeyinin kitabxanasına hədiyyə edildiyini bildirib.
Daha sonra konfrans seksiya və bölmələrlə işini davam etdirib. Filologiya və sənətşünaslıq elmləri olmaqla, iki seksiyadan ibarət olan konfransın bölmələrinin hər biri bu il yuvarlaq ildönümü olan görkəmli şəxsiyyətlərimizə həsr edilib. Belə ki, Filologiya elmləri seksiyası Əzizə Cəfərzadənin anadan olmasının 100 illiyinə həsr olunan Ədəbiyyatşünaslıq bölməsi və Səməd Vurğunun anadan olmasının 115 illiyinə həsr olunan Dilçilik bölməsi olaraq formalaşdırılıb. Sənətşünaslıq elmləri seksiyası isə Lətif Kərimovun anadan olmasının 115 illiyinə həsr oluan Mədəniyyətşünaslıq bölməsi və Xan Şuşinskinin anadan olmasının 120 illiyinə həsr olunan İncəsənət bölməsi olmaqla iki hissədən ibarət olub.
Konfransda respublikanın müxtəlif ali təhsil müəssisələrinin tələbələrinin, həmçinin universitetlərin və AMEA institutlarının magistr və gənc alimlərinin apardıqları tədqiqat mövzularını əhatə edən məruzələr dinlənilib.
Tədbirdə Sumqayıt Dövlət Universitetinin Gənc Alim və Mütəxəssislər Şurasının sədri, filologiya üzrə fəlsəfə doktoru, dosent Xəyalə Mürsəliyeva, Bakı Dövlət Universiteti Şərqşünaslıq fakültəsinin dekan müavini Şahin Yusifli, Azərbaycan Turizm və Menecment Universitetinin müəllimi Fatimə Süleymanova, Bakı Musiqi Akademiyasının tələbəsi Tamilla Süleymanova və digərlərinin də daxil olduğu 50-yə yaxın məruzəçi iştirak edib.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.