Azərbaycan Milli Elmlər Akademiyası

AMEA-nın Nizami Gəncəvi adına Ədəbiyyat İnstitutu, Tarix İnstitutu və Koreya Donqduk Qadınlar Universitetinin Avrasiya Türk Araşdırmalar İnstitutu ilə birgə Koreya-Azərbaycan II Humanitar Forumu keçirilib.

Forum Koreyada Tekstil Mərkəzində, Azərbaycanda isə “Hayat Regency” otelində vebinar şəklində keçirilib və YouTube-da canlı yayımlanıb.

Forumun təşkilatçısı olan Avrasiya-Türk Araşdırmaları İnstitutunun rəhbəri, koreyalı professor Eunkyung OH (O Inqyonq) 2022-ci ildə iki ölkə arasında diplomatik əlaqələrin qurulmasının 30 illiyinin tamam olması münasibətilə hər iki ölkənin Xarici İşlər Nazirliyi tərəfindən humanitar elmlər forumunun birgə və müntəzəm əsasda keçiriləcəyinə ümidvar olduğunu bildirib.

Koreya Respublikasının Azərbaycandakı səfiri Kim Tonq Op isə “xalqlarımız fərqli yaşayış məskənlərində yaşasalar, fərqli tarixə, fərqli dilə sahib olsalar da, düşünürəm ki, humanitar forumda keçirilən mübadilə sayəsində xalqalar arasında müdadilə və qarşılıqlı anlaşma daha da artacaq və xalqlarımız bir-birini daha yaxın hiss edəcək”, -deyə çıxış edib.

Tədbirdə Azərbaycan Respublikasının Koreyadakı səfiri Rəmzi Teymurov yaxın gələcəkdə Azərbaycan-Koreya humanitar forumlarının təşkili ilə yanaşı, Azərbaycan-Koreya və türk dünyası-Koreya formatlarında müxtəlif humanitar mövzular üzrə elmi-praktiki konfransların keçiriləcəyini qeyd edib.

Humanitar Forum “Dil-Ədəbiyyat” və “Tarix-Mədəniyyət” olmaqla iki sessiyada keçirilib, hər bir sahə üzrə müxtəlif mövzular təqdim edilib. Xüsusilə, Koreya və Azərbaycan arasında müqayisəli ədəbiyyat araşdırmasının nəticələri ilk dəfə olaraq bu forumda açıqlanaraq diqqət çəkib.

Forumda AMEA-nın vitse-prezidenti, Nizami Gəncəvi adına Ədəbiyyat İnstitutunun baş direktoru akademik İsa Həbibbəyli konfrans iştirakçılarını salamlayaraq, bu cür tədbirlərin iki ölkə arasındakı ədəbi-mədəni əlaqələrin inkişafına töhfə olduğunu qeyd edib. “Mən hesab edirəm ki, bu keçirilən beynəlxalq konfransda burada dinlənilən məruzələr, aparılacaq müzakirələr bizim bundan sonrakı əlaqələrimizin daha da genişlənməsinə və möhkəmlənməsinə kömək edəcək”, - deyə akademik əlavə edib.

Seul Milli Universitetinin professoru Banq Minhonun “Azərbaycanın xalq şairi Bəxtiyar Vahabzadənin koreyalı şair Şin Donq-yup’un yaradıcılığı ilə müqayisəli təhlili”, professor Bədirxan Əhmədlinin “Kim Jiha və Xəlil Rza Ulutürkün yaradıcılığında demokratik və milli mücadilənin inikası”, filologiya üzrə fəlsəfə doktoru Teyyub Quliyevin “Koreya və türk dillərində leksik paralelliklər”, tarix elmləri doktoru Tofiq Nəcəflinin “Azərbaycan şəhərlərinin inkişafında böyük İpək yolunun əhəmiyyəti (XII-XV əsrlər), sənətşünaslıq üzrə fəlsəfə doktoru Elçin Əliyevin “Azərbaycan və Cənubi Koreya arasında müasir incəsənət sahəsində layihələrin inteqral formatı”, professor Kim Conq-ilin “Koreya və Azərbaycan mütəxəssisləri ilə birgə aparılan arxeoloji qazıntılara dair gələcək inkişaf planı” və başqa məruzələr dinlənilib. Müzakirə zamanı professor Cavanşir Yusifli, filologiya üzrə fəlsəfə doktoru Sunah Choi, filologiya üzrə fəlsəfə doktoru Esmira Fuad, tarix üzrə fəlsəfə doktoru Ceyhun Eminli, tarix üzrə fəlsəfə doktoru Rəşad Mustafa, filologiya üzrə fəlsəfə doktoru Younq-Hee Lee və başqaları çıxış ediblər.

Azərbaycanda 2021-ci il "Nizami Gəncəvi İli" elan edilib. Bunu qeyd etmək üçün Avrasiya-Türk Araşdırmalar İnstitutu dekabrın sonunda Nizami Gəncəvi xüsusi sayının nəşri ilə yanaşı, şairə dair xüsusi mühazirə də keçirməyi planlaşdırır. Həmçinin 2022-ci ilin yanvar ayında pulsuz Azərbaycan dili kursu da təşkil olunacaqdır. Donqduk Qadınlar Universitetinin Avrasiya-Türk Araşdırmaları İnsitutu 2016-cı ildə yarandığı gündən etibarən Özbəkistan da daxil olmaqla türk ölkələri ilə bağlı müxtəlif akademik fəaliyyətlər həyata keçirməkdədir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.