Azərbaycan Milli Elmlər Akademiyası

Məlum olduğu kimi, ölkəmizdə insanların sağlam təbii şəraitdə yaşamasını ən yüksək səviyyədə təmin etmək Azərbaycanda reallaşdırılan milli inkişaf strategiyasının prioritet istiqamətlərindən biridir. Azərbaycan dövləti ekologiyanın və ətraf mühitin mühafizəsi məsələsinə daim xüsusi diqqət və qayğı ilə yanaşır.

Dövlət siyasətinə hər zaman dəstək verən AMEA Yüksək Texnologiyalar Parkında Azərbaycan Respublikası Prezidenti İlham Əliyevin 60 illik yubileyi münasibətilə növbəti ağacəkmə aksiyası keçirilib.

Aksiyada texnoparkın baş direktoru, iqtisad üzrə fəlsəfə doktoru Vasif Abbasov çıxış edərək Azərbaycan xalqının böyük oğlu, ümummilli lider Heydər Əliyevin siyasi xəttinin davamçısı, ölkəmizin Prezidenti, Müzəffər Ali Baş Komandan İlham Əliyevin Azərbaycanın çiçəklənməsi, dünyanın qabaqcıl ölkələrindən birinə çevrilməsi istiqamətində gördüyü məqsədyönlü işlərdən danışıb.

“Ali Baş Komandan Vətən müharibəsində qazandığı böyük qələbə ilə lider kimi adını tarixə əbədi yazdı”, - deyə vurğulayan V.Abbasov Azərbaycan vətəndaşlarının 30 ilə yaxın davam edən torpaq həsrətinə son qoyan İkinci Qarabağ müharibəsinin Azərbaycan üçün tarixi əhəmiyyətini diqqətə çatdırıb. O, şəhidlərimizin qanı bahasına qazanılmış möhtəşəm zəfərin xalqımızın yaddaşında silinməz izlər qoyduğunu, xalqın inamını özünə qaytardığını bildirib. Baş direktor əlavə edib ki, Azərbaycan xalqı bundan sonra da öz liderinə böyük etimad göstərəcək, hərbi qələbəni siyasi qələbə kimi möhkəmləndirəcək, yumruq kimi Azərbaycan Prezidentinin ətrafında sıx birləşəcək.

Son illərdə bütün sahələrdə olduğu kimi, Azərbaycan elmində də böyük nailiyyətlərə imza atıldığını deyən V.Abbasov bu sahədə AMEA-nın yorulmaz fəaliyyətindən, Akademiya rəhbərliyinin həyata keçirdiyi genişmiqyaslı islahatlardan bəhs edib.

Baş direktor bildirib ki, Prezident İlham Əliyevin doğum gününə töhfə olan bu kimi təşəbbüslərin həyata keçirilməsi təbiətin və ekoloji mühitin mühafizəsi, biomüxtəlifliyin qorunması baxımından mühüm əhəmiyyətə malikdir. Onun sözlərinə görə, insanlar arasında ekoloji mədəniyyətin və təbiətə qayğı hissinin güclənməsində böyük rolu olan bu kimi aksiyalarda əkilən hər bir ağac gələcək nəsillərə yadigar qalacaq.

Aksiya zamanı texnoparkın ərazisində 60 ədəd Xan çinarı, eləcə də müxtəlif növ dekorativ ağac tingləri əkilib, onlara aqrotexniki qaydada qulluq göstərilib, həmçinin təmizlik-abadlıq işləri aparılıb.

Ağacəkmə aksiyasında YT Parkın kollektivi ilə yanaşı, texnoparkın rezidentlərinin əməkdaşları da fəal iştirak ediblər.

Qeyd edək ki, tədbir pandemiya dövrünün tələblərinə riayət edilməklə həyata keçirilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.