Azərbaycan Milli Elmlər Akademiyası

İyulun 7-də Mərkəzi Elmi Kitabxanada AMEA Rəyasət Heyəti üzvlərinin elmi müəssisə və təşkilatların rəhbərləri ilə “Açıq mikrofon” formatında görüşü keçirilib.

Tədbiri giriş sözü ilə açan AMEA-nın prezidenti v.i.e., akademik Arif Həşimov bu görüşün rəsmi formatda deyil, yarım illik iş mövsümünün başa çatdığı bir şəraitdə elmi, elmi-təşkilati fəaliyyətin yekunlarını müzakirə etmək, elm qarşısında duran vəzifələri müzakirə etmək, elmi müəssisə və təşkilatların mövcud problemlərini dinləmək, gələcək fəaliyyət istiqamətlərini müəyyənləşdirmək və səmimi müzakirələr aparmaq məqsədilə keçirildiyini söyləyib.

Akademiyanın tarixən Azərbaycanın ictimai-siyasi, iqtisadi həyatında aktiv rol oynadığını deyən akademik Arif Həşimov bu gün AMEA-da istər ölkənin sosial-iqtisadi inkişaf istiqamətlərinə, istərsə də müasir dünyanın çağırışlarına uyğun mühüm tədqiqatların aparıldığını söyləyib.

Akademik Arif Həşimov Azərbaycan Respublikasının Prezidenti cənab İlham Əliyevin Sərəncamı əsasında  2022-ci ilin “Şuşa İli” elan edilməsi ilə bağlı AMEA-nın elmi müəssisə və təşkilatları tərəfindən görülmüş işlər haqqında danışıb, ilin sonunadək bu istiqamətdə bir sıra mühüm vəzifələrin də həyata keçirilməsi zərurətini diqqətə çatdırıb.

Cari ilin aprel ayının 27-də AMEA-nın Ümumi yığıncağının baş tutduğunu və Akademiyanın gələcək fəaliyyət planını əks etdirən qərar layihəsinin qəbul olunduğunu xatırladan akademik Arif Həşimov layihənin yekun variantının hazırlanması məqsədilə bölmə üzvləri ilə görüşlərin keçirildiyini bildirib. O, atılan bütün addımların Akademiyanın və bütövlükdə Azərbaycan elminin inkişafının dinamikliyinin təmin edilməsi məqsədi daşıdığını söyləyib.

Tədbirdə, AMEA-nın Geologiya və Geofizika İnstitutunun baş direktoru, akademik Akif Əlizadə, AMEA-nın vitse-prezidentləri, akademiklər İsa Həbibbəyli, Dilqəm Tağıyev, İradə Hüseynova, AMEA Rəyasət Heyətinin üzvləri, akademiklər Fikrət Əliyev, Adil Qəribov, Neft-Kimya Prosesləri İnstitutunun baş direktoru, akademik Vaqif Abbasov, Aşqarlar Kimyası İnstitutunun baş direktoru, akademik Vaqif Fərzəliyev, Folklor İnstitutunun baş direktoru, akademik Muxtar İmanov, Riyaziyyat və Mexanika İnstitutunun baş direktoru, AMEA-nın müxbir üzvü Misir Mərdanov, Biofizika İnstitutunun baş direktoru, AMEA-nın müxbir üzvü Oktay Qasımov, Respublika Seysmoloji Xidmət Mərkəzinin baş direktoru, AMEA-nın müxbir üzvü Qurban Yetirmişli, Şamaxı Astrofizika Rəsədxanasının baş direktoru, AMEA-nın müxbir üzvü Namiq Cəlilov, İqtisadiyyat İnstitutunun baş direktoru, professor Nazim İmanov, Elm Tarixi İnstitutunun baş direktoru, professor Məryəm Seyidbəyli və Fiziologiya İnstitutunun baş direktoru, professor Ulduz Həşimova və digərləri müzakirələrə qoşularaq hazırkı şəraitdə Akademiya qarşısında duran vəzifələrdən, mövcud problemlərin aradan qaldırılması yollarından, Akademiyanın strukturunun və idarəedilməsinin təkmilləşdirilməsi, yeni maliyyələşmə mexanizmlərinin tətbiqi zərurətindən, yüksəkixtisaslı kadr hazırlığı sahəsində həyata keçirilməli tədbirlərdən bəhs ediblər.

Müzakirələrdə Akademiyanın maddi-texniki bazasının gücləndirilməsi, laboratoriyalarının müasir cihazlarla təmin olunması, xaricdən avadanlıqların alınması və gömrük sənədləşməsinin sadələşdirilməsi, müəssisələrdə olan cihazların təmiri və sazlanması, əvvəlki illərdən alınmış cihazlardan əldə olunan nəticələrin ictimaiyyətə təqdim edilməsi, AMEA-nın magistraturasında dərs deyən müəllimlərin stimullaşdırılması, xarici dillərin tədrisi sahəsində fəaliyyətin genişləndirilməsi, gənclərin Avropanın müxtəlif ölkələrinə təhsil almaq üçün göndərilməsi, kadrların uyğunluğunun müəyyənləşdirilməsi üçün attestasiyanın aparılması, institutlarda elmlər doktorluğu üzrə müdafiəyə diqqətin artırılması, elmi diasporun potensialından daha geniş istifadə edilməsi, elmin maliyyələşdirilməsində qrant layihələri üzrə ünvanlı maliyyələşmə mexanizmlərinin tətbiqi, göndərilən mövzuların institutların alimlərinin iştirakı ilə müzakirəsi, yeni müstəqil maliyyələşmə mexanizmindən istifadə edilməsi, Akademiyada Tətbiq şöbəsinin bərpa edilməsi, şəhərdən kənarda eksperimental sınaqlar aparmaq üçün mərkəzin yaradılması, ölkədəki bütün elmi ekspertizalarda Akademiyanın yaxından iştirakı və s. istiqamətlərdə təkliflər səsləndirilib.

Sonda akademik Arif Həşimov səsləndirilən təkliflərə münasibətini bildirib, tədbir iştirakçılarını qarşıdan gələn Qurban bayramı münasibətilə təbrik edərək görüşə yekun vurub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.