Azərbaycan Milli Elmlər Akademiyası

AR Elm və Təhsil Nazirliyinin akademik Əli Quliyev adına Aşqarlar Kimyası İnstitutunun (AKİ) elmi işçisi İbadulla Mahmudov elmi fəaliyyətində fərqləndiyinə görə “Gənclər üçün akademik Əli Quliyev” adlı mükafatla təltif edilib.

Bununla bağlı təqdimat mərasimi keçirilib. Ona diplom və pul mükafatını institutun baş direktoru, akademik Vaqif Fərzəliyev və akademik Əli Quliyevin oğlu, Azərbaycan Tibb Universitetinin professoru Fikrət Quliyev təqdim ediblər.

Bu mükafat artıq 10 ilə yaxındır ki, elmi fəaliyyətində xüsusi nailiyyətlər əldə etmiş bir gənc alimə hər il təqdim olunur.

İbadulla Mahmudov son bir ildə apardığı beynəlxalq səviyyəli tədqiqatın nəticələrini 3 nüfuzlu, impakt faktorlu jurnalda  dərc etdirdiyi üçün bu adlı mükafata layiq görülüb.

Məlumat üçün bildirək ki, İ.Mahmudov Portuqaliyanın Lissabon Universitetində zərif üzvi sintez üsulları yeni üzvi birləşmələr və onların müxtəlif metal komplekslərinin sintezi və tədqiqi ilə bağlı təcrübədə iştirak etmişdir. 

O, hazırda öz tədqiqatlarını AKİ-nin Fizioloji fəal üzvi birləşmələr laboratoriyasında elmi işçi kimi davam etdirir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.