Azərbaycan Milli Elmlər Akademiyası

Azərbaycan Yazıçılar Birliyinin 90 illik yubileyində iştirak məqsədilə ölkəmizdə səfərdə olan Özbəkistan Yazıçılar Birliyinin sədr müavini Minhaciddin Mirzo, “Yanqi Ovoz” Mərkəzi Asiya Yazıçılar və Tarixçilər Birliyinin sədri, qırğızıstanlı şair, tərcüməçi Joldoşbek Monoldorov və həmyerlilərimiz - Aktivist Rəssamlar Assosiasiyasının (ARA) üzvü Naqiyə Rzayeva, Nəvai Metin və İntiqam Cəfərov Nizami Gəncəvi adına Milli Azərbaycan Ədəbiyyatı Muzeyində olublar.

Muzeyin direktoru akademik Rafael Hüseynovla görüşən qonaqlara bildirilib ki, çoxəsrlik zəngin tarixi ənənələrə bağlılıq və ortaq ədəbi abidələrin olması bu gün də Azərbaycan-Özbəkistan-Qırğızıstan ədəbi-mədəni əlaqələrinin davam  etdirilməsinə zəmin yaradıb.

Akademik Rafael Hüseynov qeyd edib ki, özbək klassik şairlərinin Nizami Gəncəvi irsinə münasibəti, həmçinin XV əsrdən sonra Əlişir Nəvainin əsərlərinin Azərbaycan klassiklərinin yaradıcılığına təsiri  danılmazdır və bu, muzeyin ekspozisiyasında əksini tapıb.

Görüşdə Azərbaycan-Özbəkistan ədəbi-mədəni əlaqələrinin daha da genişləndirilməsinə dair müzakirələr aparılıb. Həmçinin özbək əsilli şair, filosof Əlişir Nəvainin 585 illik yubileyi ərəfəsində birgə tədbirlərin həyata keçirilməsi ilə bağlı fikir mübadiləsi aparılıb.

Komparativistika və bədii tərcümə şöbəsinin elmi işçisi Zarema İbrahimovanın təqdimatı ilə muzeyin ekspozisiyası ilə tanış olan türksoylu qonaqlar “Rəy kitabı”nda təəssüratlarını bölüşərək, Azərbaycan xalqının nadir irsini qoruyub saxlamaqda Nizami Muzeyinə minnətdarlıqlarını bildiriblər.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.