Azərbaycan Milli Elmlər Akademiyası

Azərbaycanın Rusiya Federasiyasındakı səfiri Rəhman Mürsəlov və səfirliyin nümayəndə heyəti Moskva vilayətinin Dubna şəhərində yerləşən Birləşmiş Nüvə Tədqiqatları İnstitutuna (BNTİ) səfər ediblər.

Nümayəndə heyəti ilk olaraq BNTİ-də Azərbaycanın Milli Qrupu (AMQ) ilə görüşüb. Görüşdə BNTİ-nin Azərbaycan üzrə əlaqələndiricisi, Nüvə problemləri laboratoriyasının rəhbəri, fizika-riyaziyyat elmləri doktoru  Yevgeni Yakuşev, Azərbaycanın BNTİ-də Milli Qrupunun rəhbəri Nazim Hüseynov, qrupun nümayəndələri  və BNTİ-nin digər səlahiyyətli şəxsləri iştirak ediblər.

Yevgeniy Yakushev qonaqlara BNTİ-nin yaranma tarixi, fəaliyyət istiqamətləri haqqında ətraflı məlumat verib, sualları cavablandırıb.

Daha sonra  Nazim Hüseynov AMQ, burada  görülən işlərdən danışıb. O, AMQ-nin ölkəyə verdiyi töhfələri əks etdirən təqdimatla çıxış edib.

Fizika İnstitutunun Elmi innovasiyalar və xarici əlaqələr şöbəsinin müdiri Rüstəm Rüstəmov tədbirdə onlayn rejimdə iştirak edib. R.Rüstəmov Azərbaycanın BNTİ-də fəaliyyətinin əhəmiyyətindən danışıb.

Səfirliyin nümayəndə heyəti BNTİ-nin direktoru akademik Qriqori Trubnikovla görüşüb. Görüş çərçivəsində gələcəkdə qarşılıqlı əməkdaşlığın perspektivliyi haqqında ətraflı müzakirələr aparılıb.

Sonda qonaqlar BNTİ-nin laboratoriyaları ilə tanış olublar.   

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.