Azərbaycan Milli Elmlər Akademiyası

AMEA-nın Məhəmməd Füzuli adına Əlyazmalar İnstitutunun Türkdilli əlyazmaların tədqiqi şöbəsinin baş elmi işçisi filologiya elmləri doktoru Nəzakət Məmmədli Özbəkistanda Qaraqalpaq xalqının böyük şairi Hacıniyaz Kosıbay oğlunun anadan olmasının 200 illik yubileyinə həsr olunmuş “Hacıniyaz Kosıbay oğlu: Bəylər, tərif edim Qalpaq yurdunu” kitabının təqdimat mərasimində və “Hacıniyaz Kosıbay oğlu – 200” adlı Beynəlxalq elmi-nəzəri konfransda iştirak edib.

Alimimiz Özbəkistanın Berdağ adına Qaraqalpaq Dövlət Universitetində baş tutmuş təqdimat mərasimində şairin seçilmiş əsərlərindən ibarət kitabın müəllifi kimi çıxış edərək Qaraqalpaq və Azərbaycan ədəbi əlaqələrindən, Hacıniyaz yaradıcılığının bədii xüsusiyyətlərindən bəhs edib. Qeyd edək ki, N.Məmmədli təqdimatı keçirilmiş “Hacıniyaz Kosıbay oğlu: Bəylər, tərif edim Qalpaq yurdunu” adlı şeirlər kitabının tərtibçisi olmaqla yanaşı, həm də tərcüməçisi, orada yer alan qeyd və izahların, giriş məqaləsinin və lüğətin müəllifidir.

Növbəti gün Nəzakət Məmmədli Nökis şəhərində yerləşən Ok Kuş kompleksində (kompleks ölçüsünə görə Ginnesin Rekordlar Kitabına düşüb) beynəlxalq elmi-nəzəri konfransın açılış mərasimində iştirak edib və Qaraqalpaq ədəbiyyatına verdiyi töhfələrə görə Qaraqalpaq Respublikası Ali Məclisinin “Fəxri üzvlük diplomu” ilə təltif olunub.

15 noyabr 2024-cü il tarixdə alim konfrans çərçivəsində keçirilmiş bölmə iclaslarında “Hacıniyaz və Azərbaycan aşıq ədəbiyyatı” mövzusunda məruzə edib, çıxışına görə Türk Akademiyasının Təşəkkürnaməsi və təşkilatçı qurumların serifikatına layiq görülüb.

Qeyd edək ki, təqdimat mərasimi və beynəlxalq elmi-nəzəri konfrans Beynəlxalq Türk Akademiyası, Qaraqalpaq Dövlət Universiteti və Qaraqalpaq Humanitar Elmlər İnstitutunun birgə təşkilatçılığı həyata keçirilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.