Azərbaycan Milli Elmlər Akademiyası

AMEA-nın akademik Ziya Bünyadov adına Şərqşünaslıq İnstitutunun şöbə müdiri fəlsəfə elmləri doktoru, professor Roida Rzayeva 21-24 noyabr 2024-cü il tarixində Türkiyənin Antalya şəhərində keçirilən Ziya Göyalpın vəfatının 100 illiyinə həsr edilmiş Türk Dünyasının V Beynəlxalq Təhsil və Sosial Elmlər Konqresində iştirak edib.

Azərbaycanlı alim konqresdə “Türk Dünyası yeni geosiyasi konyunkturada” adlı məruzə ilə çıxış edib.

Professor öz məruzəsində qeyd edir ki, informasiya ideyası müasir siyasi prosesdə əsas amildir. Beynəlxalq təhlükəsizliyin əsas parametrləri dəyişir. İnformasiya sahəsi informasiya cəmiyyətində mədəni üstünlüklərin rolunu aktuallaşdıran mədəni dəyərlər uğrunda mübarizə ilə xarakterizə olunur. Milli mentalitet və mədəniyyət dövlətin informasiya təsirinə məruz qalan əsas geosiyasi potensialıdır. Qeyd olunanlar virtual məkanda siyasi təfəkkürün və informasiya üstünlüyünün simvolik mahiyyətini hər zaman olduğundan daha çox aktuallaşdırır.

Vurğulanır ki, geosiyasi müstəvidə yaranan reallıqlara uyğunlaşma Türk dünyası ölkələri üçün zərurətə çevrilib. Türk xalqlarının mental birliyi informasiya məkanında türk mədəniyyətinin “simvolik kapital”ıdır, strateji geosiyasi əhəmiyyəti hər gün daha da artır. Məhz bu (mədəniyyətin “simvolik kapital”ı), türk cəmiyyətlərinin siyasi mədəniyyətinin mental və mənəvi müstəvisini təşkil edir.

Alim qeyd edib ki, “simvolik kapital” qlobal kommunikasiya kanallarına ötürülür və bu gün “yumşaq güc” kimi istifadə olunur. Bu, xüsusilə informasiya və ideoloji qarşıdurma kontekstində mədəni və ideoloji təsirin aktuallığını müəyyən edir. Bu kontekstdə informasiya və media sahəsi virtual siyasi mübarizədə informasiya təhlükəsizliyinin təmin edilməsində mühüm rol oynayır.

Professorun məruzəsi maraqla qarşılanıb. Konqres iştirakçıları R.Rzayevanın tədqiq etdiyi mövzuların yüksək aktuallığını qeyd ediblər.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.