Azərbaycan Milli Elmlər Akademiyası

Elm və Təhsil Nazirliyinin Fizika İnstitutunda Ümummilli Lider Heydər Əliyevə həsr olunmuş anım tədbiri keçirilib.

Öncə Ulu Öndər Heydər Əliyevin xatirəsi bir dəqiqəlik sükutla yad olunub.

Tədbiri giriş sözü ilə açan institutun baş direktoru akademik Arif Həşimov Ümummilli Lider Heydər Əliyevin çıxışlarından söz açıb. Bildirib ki, o, hər zaman qeyd edirdi ki, bir gün işğal altında olan torpaqları geri qaytaracağıq. Bütün bunların onun uzaqgörən siyasətindən xəbər verdiyini qeyd edib.

Akademik Ulu Öndərin ikinci dəfə Azərbaycana hakimiyyətə qayıtmasından, Naxçıvandakı fəaliyyətindən, xalqın ona etimadından söhbət açıb. A.Həşimov Naxçıvanın blokadası dövründə Heydər Əliyevin ustalıqla siyasi tədbirlər görməsindən, özünümüdafiə qüvvələrini yaratmasından bəhs edib. Azərbaycan bayrağının Ulu Öndərin uğurlu siyasəti nəticəsində Naxçıvanda dalğalandığını bildirib.

A.Həşimov Azərbaycanın müstəqillik əldə etdikdən sonra Ümummilli Lider Heydər Əliyevin respublikanın yenidən qurulması, iqtisadiyyatının dirçəldilməsi istiqamətində gördüyü işlərdən, “Əsrin müqaviləsi”ndən bəhs edib. Bütün bunların məntiqi davamı olaraq Azərbaycan Respublikasının Prezidenti, Ali Baş Komandan İlham Əliyevin uğurlu siyasəti, müzəffər ordumuzun qəhrəmanlığı nəticəsində Azərbaycan torpaqlarının işğaldan azad olunduğunu vurğulayıb.

O, Ümummilli Lider Heydər Əliyevin Fizika İnstitutuna ziyarətlərindən də söhbət açıb.

Tədbirdə AMEA-nın müxbir üzvü Vəli Hüseynov, fizika üzrə fəlsəfə doktorları Zaur Süleymanov, Həmkarlar Komitəsinin sədri Sitarə Bağırova və YAP-ın fəal üzvü, elmi işçi Bayram Xudayarov, elmi işçi Lalə Əliyeva Ulu Öndər Heydər Əliyev haqqında xatirələrini bölüşüblər.

Sonda A.Həşimov qeyd edib ki, institutdakı Ulu Öndər Heydər Əliyevə həsr olunan muzeydə mətbuatda dərc olunan yeni məqalələr yerləşdirilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.