Azərbaycan Milli Elmlər Akademiyası

Dünya Azərbaycanlı Alimlər Birliyinin sədri, professor Məsud Əfəndiyev AMEA-nın Naxçıvan Bölməsinin qonağı olub.

Naxçıvan Bölməsi kollektivinin iştirakı ilə keçirilən görüşdə Bölmənin sədri, akademik İsmayıl Hacıyev çıxış edərək qonağı salamlayıb. Azərbaycanlı alimlərin dünya elminə verdikləri töhfələri yüksək qiymətləndirən akademik qeyd edib ki, xaricdə yaşayan hər bir azərbaycanlı alim elmə yanaşı, həm də öz vətənini, xalqını uğurla təmsil edir.

Ölkədən kənarda yaşayan Azərbaycan alimləri ilə görüşlərin, onların fikir və tövsiyələrinin xüsusilə gənc nəsil üçün müsbət təsirlərini vurğulayan İsmayıl Hacıyev əvvəlcə qonağı kollektivə təqdim edib.

Bildirilib ki, Məsud Əfəndiyev Almaniyada yaşayan azərbaycanlı riyaziyyatçı professordur. O, Almaniya hökumətinin təsis etdiyi dünya elmində ən yüksək təltiflərdən sayılan “Aleksander fon humboldt” mükafatını almış ilk azərbaycanlıdır. Alim Almaniyanın müxtəlif universitetlərində, o cümlədən Münhen, Ştutqart Berlin universitetlərində dərs deyib. Alim Dünya Azərbaycanlı Alimlər Birliyinin yaradılmasının təşəbbüskarı və rəhbəri, çoxsaylı elmi əsər və araşdırmalar müəllifidir. Elm sahəsində nailiyyətlərinə və Azərbaycan diasporunun inkişafında xidmətlərinə görə Azərbaycan Respublikasının Prezidenti İlham Əliyev tərəfindən 21 aprel 2022-ci ildə "Əməkdar elm xadimi" fəxri adı ilə təltif edilib.

Çıxışı zamanı akademik İsmayıl Hacıyev AMEA Naxçıvan Bölməsinin yaranma tarixi, strukturu, fəaliyyətinin əsas istiqamətləri və əldə olunan elmi nəticələr haqqında qonağı bilgiləndirib, sonda qonağa kitab hədiyyə edib.

Yığıncaqda çıxış edən professor Məsud Əfəndiyev Naxçıvana gəlişinin məqsədindən danışıb, Almaniyada yaşayıb fəaliyyət göstərən azərbaycanlı alimlərlə bağlı bəzi statistik göstəriciləri diqqətə çatdırıb. Ölkədən kənarda yaşayan azərbaycanlı alimlərin təşkilatlanması və əlaqələrinin genişləndirilməsi məqsədilə təsis olunmuş Dünya Azərbaycanlı Alimlər Birliyi barədə məlumat verib. Xoş təəssüratlarını iştirakçılarla paylaşıb.

Sonda alim ona ünvanlanan sualları cavablandırıb.

Professor həm də bölmə alimlərinin nəşr olunmuş əsərlərindən ibarət sərgi ilə tanış olub, öz təəssüratlarını bölüşüb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.