Azərbaycan Milli Elmlər Akademiyası

Elm və Təhsil Nazirliyinin Fizika İnstitutunda Bərk cisimlərdə rezonans hadisələri, Almazabənzər və çoxkomponentli birləşmələrin optik və transport xassələri və  Kosmik şüa mənbələri fizikası laboratoriyalarının kollektivləri ilə görüş keçirilib.

Görüşü giriş sözü ilə institutun baş direktoru, akademik Arif Həşimov açıb. O qeyd edib ki, cari ilin əvvəlindən institutun bütün laboratoriya və şöbələrin kollektivləri ilə görüşlərin keçirilməsi nəzərdə tutulub və bu artıq ikinci görüşdür. Bundan öncə olduğu kimi bu görüşlər institutun daha məhsuldar işinin qurulması və hər bir əməkdaşın prosesə cəlb olunması məqsədini daşıyır. Akademik Arif Həşimov elmi seminarların bərpa olunması və seminarların təşkili işinin AMEA-nın müxbir üzvü Səlimə Mehdiyevaya həvalə olunması haqda məlumatı iştirakçıların diqqətinə çatdırıb və laboratoriyaların əməkdaşlarının seminarda aktiv iştirakının zəruri olduğunu qeyd edib. Eyni zamanda institut çərçivəsində patent işinin aktivləşdirilməsi məqsədilə müvafiq şöbənin yaradılmasını da bildirib. 

Görüşdə institutun icraçı direktoru, professor Hüseyn İbrahimov, elmi katib Afət Kərimova, AMEA-nın müxbir üzvü Səlimə Mehdiyeva, kadrlar şöbəsinin müdiri Pərvanə İskəndərova və Elmi innovasiyalar və xarici əlaqələr şöbəsinin müdiri Rüstəm Rüstəmov iştirak ediblər. Tədbirdə müxtəlif mahiyyətli problemlərin həlli yolları və fəaliyyətin effektivliyinin artırılması istiqamətində fikir və ideyalar irəli sürülüb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.