Azərbaycan Milli Elmlər Akademiyası

Hörmətli cənab Prezident.

Azərbaycan Milli Elmlər Akademiyasının 80 illiyinin qeyd edilməsi haqqında 2025-ci il 18 mart tarixli Sərəncamınız ölkəmizdə elmin inkişafına, həyatını elmi fəaliyyətə həsr etmiş alimlərin xidmətlərinə dövlət səviyyəsində verilmiş ən yüksək qiymətin əməli ifadəsidir.

Mühüm tarixi əhəmiyyətə malik olan bu Sərəncam Azərbaycan Milli Elmlər Akademiyasına, onun kollektivinə böyük ehtiramınızı yüksək səviyyədə ifadə edir. Milli Elmlər Akademiyasının 80 illik yubileyinin keçirilməsi Azərbaycan elminin müstəqil dövlətimiz qarşısında hesabatı olacaqdır.

Səksən il ərzində Akademiyanın yubileyi cəmi üç dəfə qeyd edilmişdir. İlk dəfə 1975-ci ildə Sovet Azərbaycanının rəhbəri Heydər Əliyevin müvafiq Sərəncamı ilə Elmlər Akademiyasının 30 illik yubileyi Respublika Sarayında keçirilmiş və Akademiya “Xalqlar dostluğu" ordeni ilə təltif olunmuşdur. Bundan sonrakı tarixi mərhələdə Zati-alinizin müvafiq sərəncamları və iştirakı ilə 2005-ci ildə Milli Elmlər Akademiyasının 60 illik və 2015-ci ildə isə 70 illik yubileyləri dövlət səviyyəsində qeyd edilmişdir.

Milli Elmlər Akademiyasının yubileylərinin dövlət səviyyəsində keçirilməsi Akademiyanın və alimlərimizin fəaliyyətinə verilən yüksək qiymətlə bərabər, həm də Azərbaycan elminin daha da inkişafına xidmət etmişdir.

Zati-alinizin Akademiyanın 80 illik yubileyi haqqında imzaladığı Sərəncamdan irəli gələn tədbirlər də Azərbaycan elminin yeni tarixi dövrdə müstəqil dövlətimizin inkişaf strategiyasına və milli prioritetlərinə, habelə bəşəri elmi ideallara daha yüksək səviyyədə xidmət etməsinə meydan açacaqdır.

Möhtərəm cənab Prezident, Azərbaycan Milli Elmlər Akademiyasının kollektivi ölkəmizin dövlət ali elmi təşkilatı olan Akademiyanın fəaliyyətinə və inkişafına göstərdiyiniz böyük diqqətə və qayğıya görə Sizə dərin minnətdarlığını bildirir.

Alimlərimiz bütövlükdə Azərbaycan elminin, o cümlədən Milli Elmlər Akademiyasının qorunub saxlanılması, inkişaf etdirilməsi üçün xalqımızın Ümummilli Lideri Heydər Əliyevə və Azərbaycan Respublikasının Prezidenti kimi Zati-alinizə borclu və minnətdardır.

Azərbaycan xalqı üçün çox əlamətdar olan 2025-ci ilin axır çərşənbəsi günü imzaladığınız tarixi Sərəncam Azərbaycan alimlərinə, Milli Elmlər Akademiyasının kollektivinə qeyri-adi və təkrarsız bayram sevinci bəxş etmişdir.

Fürsətdən istifadə edərək, Milli Elmlər Akademiyasının kollektivi adından Sizi Novruz və Ramazan bayramları münasibətilə ürəkdən təbrik edir, Sizə və ailənizə daha böyük uğurlar və möhkəm cansağlığı arzulayırıq.

Möhtərəm cənab Prezident, Sizi əmin edirik ki, Azərbaycan Milli Elmlər Akademiyasının kollektivi həmişəki kimi bundan sonra da Sizin ətrafınızda sıx birləşərək ölkəmizdə və dünya miqyasında həyata keçirdiyiniz məqsədyönlü və uğurlu siyasəti ürəkdən dəstəkləyəcəkdir.

Dərin hörmətlə,

Azərbaycan Milli Elmlər Akademiyasının kollektivi.

Azərbaycan Respublikası, Bakı şəhəri.

President.az