Azərbaycan Milli Elmlər Akademiyası

“İkinci Qarabağ müharibəsi zamanı müzəffər Azərbaycan Ordusunun şanlı tarix yazaraq Qarabağı işğaldan azad etməsi ilə bu ərazilərdə olan zəngin faydalı qazıntı yataqları yenidən öz sahiblərinə geri qaytarıldı. Yaxın zamanda AMEA-nın Təbiət Tarixi Muzeyinin əməkdaşlarının Kəlbəcər və Zəngilanda olan qızıl yataqlarına, eləcə də Laçın rayonu ərazisində yerləşən yataqlara geoloji ekspedisiyalarının təşkili planlaşdırılır”.

Bu barədə muzeyin baş elmi işçisi, geologiya-minerologiya üzrə fəlsəfə doktoru Nağı Nağıyev məlumat verib. Alim qeyd edib ki, hazırda muzeydə nümayiş olunan Qarabağda yerləşən yataqlardan çıxarılmış nümunələr Sovet dövründə əldə edilmiş materiallardır.

Onun sözlərinə görə, Təbiət Tarixi Muzeyində yer alan geoloji nümunələrin böyük əksəriyyəti Azərbaycanın faydalı qazıntı yataqlarından toplanılır: “Ölkəmizdə hazırda 300-dən çox filiz yatağı mövcuddur. Azərbaycanda mövcud olan faydalı qazıntı yataqlarının böyük bir qismi Yura dövründə əmələ gəlmiş yataqlardır. Onlar arasında ölçüsünə görə ən böyük yataq Balakən rayonunda yerləşən Filizçay polimetal yatağı hesab olunur. Filizçay yatağı kolçedan-polimetal filizlərinin sənaye ehtiyatlarına görə Avropada ikinci yataq sayılır”.

N.Nağıyev bildirib ki, hazırda bu yataqdan əldə olunan nadir nümunələr muzeydə eksponat kimi nümayiş olunur. Bununla yanaşı, Gədəbəy və Daşkəsən qızıl yatağından əldə olunan materiallar muzeyi ziyarət edənlər tərəfindən böyük maraqla qarşılanır.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.